女性的心情
https://www.youtube.com/watch?v=I_GWrVItPlU
《女性的心情》Lú-sìng ê Sim-tsîng
文夏Bûn-hā
——————————————
我信你對我的情
guá sìn lí tuì guá ê tsîng
毋是一時陣
m̄-sī tsi̍t-sî-tsūn
所以我才會
sóo-í guá tsiah ē
踏入情慾的世界
ta̍h-ji̍p tsîng-io̍k ê sè-kài
哪會知
ná ē tsai
你煞變心
lí suah piàn-sim
放阮孤一个
pàng gún koo tsi̍t-ê
每日來思念著你
muí-ji̍t lâi su-liām tio̍h lí
暗暗流珠淚
àm-àm lâu tsu-luī
你若是想欲騙我
lí nā-sī siūnn-beh phiàn guá
嘛著騙到底
mā tio̍h phiàn kàu té
若毋知予人騙去
nā m̄-tsai hōo-lâng phiàn–khì
嘛袂遮艱苦
mā bē tsiah kan-khóo
啉燒酒
lim sio-tsiú
雖然一時會得解心悶
sui-jiân tsi̍t-sî ē-tit kái sim-būn
毋過酒若是退了
m̄-koh tsiú nā-sī thè–liáu
加添心痛苦
ka-thiam sim thòng-khóo
明明知花言巧語
bîng-bîng tsai hua-giân khá-gí
我也真戇人
guá iā tsin gōng-lâng
偏偏來愛
phian-phian lâi ài
你這个薄情的男性
lí tsit ê po̍k-tsîng ê lâm-sìng
雖然是酒中的話
sui-jiân sī tsiú-tiong ê uē
我也信賴你
guá iā sìn-lāi lí
哪會知今日
ná ē tsai kim-ji̍t
放阮就去揣別人
pàng gún tsiū khì tshuē pa̍t-lâng
我也有靈魂的人
guá iā ū lîng-hûn ê lâng
女性的一个
lú-sìng ê tsi̍t-ê
嘛會來佮人談情
mā ē lâi kah lâng tâm-tsîng
佮人會戀愛
kah lâng ē luân-ài
甘蜜的一場眠夢
kam-bi̍t ê tsi̍t-tiûnn bîn-bāng
為你來拍醒
uī lí lâi phah-tshínn
今夜才知影
kim-iā tsiah tsai-iánn
男性狼名的聲藉
lâm-sìng liông-bîng ê sing-tsik
已經是走去的人
í-king sī tsáu–khì ê lâng
哪著來留戀
ná-tio̍h lâi liû-luân
最好是放予袂記
tsuè hó sī pàng hōo buē-kì
放予流水去
pàng hōo lâu-tsuí khì
遙遠的初戀暗暝
iâu-uán ê tshoo-luân àm-mî
永遠不回來
íng-uán put huê-lâi
回想起熱戀彼時
huê-siūnn khí jia̍t-luân hit-sî
又閣流珠淚
iū-koh lâu tsu-luī
一切都拍碎去啦
it-tshè to phah-tshuì khì–lah
我的青春夢
guá ê tshing-tshun bāng
好好來收踮心內
hó-hó lâi siu tiàm sim-lāi
閣再活落去
koh-tsài ua̍h–lo̍h-khì
無一定總有一日
bô-it-tīng tsóng ū-tsi̍t-ji̍t
幸福會閣來
hīng-hok ē koh lâi
到彼日抱著希望
kàu hit-ji̍t phō-tio̍h hi-bāng
我就來等待
guá tsiū lâi tán-thāi
