船去未了情
《船去未了情》Tsûn Khì Bī-liáu Tsîng
洪瑞蘭Âng Suī-lân(秀蘭Siù-lân)
——————————————
載阮愛人去
tsài gún ài-jîn khì
彼隻船隻
hit tsiah tsûn-tsiah
已經是三個月
í-king sī sann kò-gue̍h
無閣倒轉來
bô koh tò-tńg–lâi
阮雖然走來港邊
gún sui-jiân tsáu lâi káng-pinn
毋是欲等伊轉來
m̄-sī beh tán i tńg–lâi
來懷念昔日情愛
lâi huâi-liām sik-ji̍t tsîng-ài
只有是海鳥
tsí-ū sī hái-tsiáu
伴阮寂寞的心內
phuānn gún tsi̍k-bo̍k ê sim-lāi
載阮愛人去
tsài gún ài-jîn khì
彼隻船隻
hit tsiah tsûn-tsiah
已經是放捒了阮
í-king sī pàng-sak liáu gún
偎靠他鄉外
ue-khò thann-hiunn guā
留予我只有孤影
lâu hōo guá tsí-ū koo-iánn
流落珠淚嘆運命
lâu lo̍h tsu-luī thàn ūn-miā
船螺聲海波浪聲
tsûn-lê siann hái-pho-lōng siann
擾亂著阮的心情
jiáu-luān tio̍h gún ê sim-tsiânn
痴情叫伊名
tshi-tsîng kiò i miâ
載阮愛人去
tsài gún ài-jîn khì
彼隻船隻
hit tsiah tsûn-tsiah
已經是永遠
í-king sī íng-uán
佮阮切斷了情絲
kah gún tshiat-tuān liáu tsîng-si
好親像一場眠夢
hó-tshin-tshiūnn tsi̍t-tiûnn bîn-bāng
毋願閣再來想起
m̄-guān koh-tsài lâi siūnn-khí
淒涼的海風微微
tshe-liâng ê hái-hong bî-bî
陪伴著薄命女兒
puê-phuānn tio̍h po̍k-miā lú-jî
傷心珠淚滴
siong-sim tsu-luī tih
