流浪的歌詩
《流浪的歌詩》Liû-lōng ê Kua-si
王淵卿Ông Ian-khing
銀星合唱團Gîn-tshinn Ha̍p-tshiùnn-thuân
——————————————
月光的暗暝
ge̍h-kng ê àm-mî
伴著吉他唸歌詩
phuānn tio̍h gì-tah liām kua-si
可憐的咱兄弟
khó-liân ê lán hiann-tī
流浪到都市
liû-lōng kàu too-tshī
青紅燈閃閃爍爍
tshinn-âng-ting siám-siám-sih-sih
替阮心悲意
thuè gún sim pi-ì
替阮心悲意
thuè gún sim pi-ì
阮就是一對
gún tsiū-sī tsi̍t-tuì
苦命的流浪的兄弟
khóo-miā ê liû-lōng ê hiann-tī
可愛的姑娘
khó-ài ê koo-niû
講伊就是酒家女
kóng i tsiū-sī tsiú-ka-lí
雖然是表心意
sui-jiân sī piáu sim-ì
講阮流浪兒
kóng gún liû-lōng-jî
天星也閃閃爍爍
thinn-tshinn iā siám-siám-sih-sih
替阮心哀悲
thuè gún sim ai-pi
替阮心哀悲
thuè gún sim ai-pi
唱出著一條
tshiùnn-tshut tio̍h tsi̍t-tiâu
留戀的流浪的歌詩
liû-luân ê liû-lōng ê kua-si
男兒的目屎
lâm-jî ê ba̍k-sái
有時也會流落來
ū-sî iā ē lâu–lo̍h-lâi
若親像雨水滴
ná-tshin-tshiūnn hōo-tsuí tih
沃澹阮兄弟
ak-tâm gún hiann-tī
想起著咱的運命
siūnn-khí tio̍h lán ê ūn-miā
怎樣遮爾䆀
tsuánn-iūnn tsiah-nī bái
怎樣遮爾䆀
tsuánn-iūnn tsiah-nī bái
唱出著一條
tshiùnn-tshut tio̍h tsi̍t-tiâu
悲慘的流浪的歌詩
pi-tshám ê liû-lōng ê kua-si
