悲戀的人生
《悲戀的人生》Pi-luân ê Jîn-sing
林春福Lîm Tshun-hok
——————————————
女人的美妙態度
lú-jîn ê bí-biāu thāi-tōo
害阮前途來耽誤
hāi gún tsiân-tôo lâi tam-ngōo
離開情侶
lī-khui tsîng-lī
走遍天涯
tsáu-piàn thian-gâi
看破來讓步
khuànn-phuà lâi liōng-pōo
為怎樣行到他鄉
uī-tsuánn-iūnn kiânn kàu thann-hiong
總是思念彼當初
tsóng-sī su-liām hit tong-tshoo
像今日中途
tshiūnn kim-ji̍t tiong-tôo
一時受風雨
tsi̍t-sî siū hong-hōo
想欲進
siūnn-beh tsìn
揣無步
tshē-bô pōo
欲退
beh thè
也無路
iā bô-lōo
河邊的春情夜景
hô-pinn ê tshun-tsîng iā-kíng
幫助你我談情話
pang-tsōo lí guá tâm tsîng-uē
約束將來快樂自由
iok-sok tsiong-lâi khuài-lo̍k tsū-iû
絕對無問題
tsua̍t-tuì bô būn-tuê
為怎樣悲哀命運
uī-tsuánn-iūnn pi-ai miā-ūn
總是拆開咱兩个
tsóng-sī thiah-khui lán nn̄g-ê
像一隻孤鳥
tshiūnn tsi̍t-tsiah koo-tsiáu
茫茫隨風飛
bông-bông suî hong pe
受日曝冷風吹
siū ji̍t-pha̍k líng-hong tshue
失志頭頕垂
sit-tsì thâu tàm-suê
男兒的堅定意志
lâm-jî ê kian-tīng ì-tsì
忍疼割斷好情義
jím-thiànn kuah-tn̄g hó tsîng-gī
想來顛倒成全別人
siūnn–lâi tian-tò sîng-tsuân pa̍t-lâng
犧牲了自己
hi-sing liáu tsū-kí
為怎樣事情過後
uī-tsuánn-iūnn sū-tsîng kè-āu
總是暝日心哀悲
tsóng-sī mî-ji̍t sim ai-pi
像今夜雺霧
tshiūnn kim-iā bông-bū
罩著小城市
tà tio̍h sió siânn-tshī
一時來失理智
tsi̍t-sî lâi sit lí-tì
耽誤青春期
tam-ngōo tshing-tshun kî
