港口的愛人
《港口的愛人》Káng-kháu ê Ài-jîn
金飛Kim-hui(林錦堂Lîm Kím-tông)
——————————————
初逢的彼个人
tshoo-hông ê hit ê lâng
生做真活動
sinn-tsuè tsin ua̍h-tāng
目尾來相送
ba̍k-bué lâi sio-sàng
予阮每日心茫茫
hōo gún muí-ji̍t sim bâng-bâng
較想也是伊一人
khah siūnn iā-sī i tsi̍t-lâng
伊一人
i tsi̍t-lâng
夜夜眠夢伊一人
iā-iā bîn-bāng i tsi̍t-lâng
醒來心苦痛
tshínn–lâi sim khóo-thàng
請港口月娘幫忙
tshiánn káng-kháu ge̍h-niû pang-bâng
予阮來早日揣著
hōo gún lâi tsá-ji̍t tshuē-tio̍h
心愛彼个人
sim-ài hit ê lâng
心愛的彼个人
sim-ài ê hit ê lâng
彼日在港邊
hit-ji̍t tsāi káng-pinn
目尾來相送
ba̍k-bué lâi sio-sàng
思思念念夜夜夢
su-su-liām-liām iā-iā bāng
較想也是伊一人
khah siūnn iā-sī i tsi̍t-lâng
伊一人
i tsi̍t-lâng
伊有純情佮真義
i ū sûn-tsîng kah tsin-gī
可比春花枝
khó-pí tshun-hue ki
請港口月娘保庇
tshiánn káng-kháu ge̍h-niû pó-pì
希望會早日相見
hi-bāng ē tsá-ji̍t sio-kìnn
結做好情侶
kiat-tsuè hó tsîng-lī
夢中的彼个人
bāng-tiong ê hit ê lâng
目睭圓弄弄
ba̍k-tsiu înn lāng-lāng
目尾來相送
ba̍k-bué lâi sio-sàng
你是到底佗位去
lí sī tàu-tué tó-uī khì
較想也是你一人
khah siūnn iā-sī lí tsi̍t-lâng
伊一人
i tsi̍t-lâng
一日若無看著你
tsi̍t-ji̍t nā bô khuànn-tio̍h lí
如隔三秋天
jû keh sam-tshiu thinn
請港口月娘通知
tshiánn káng-kháu ge̍h-niû thong-ti
叫伊著佮阮相見
kiò i tio̍h kah gún sio-kìnn
結做連理枝
kiat-tsuè liân-lí-ki
