可愛的小鳥
《可愛的小鳥》Khó-ài ê Sió-tsiáu
白櫻Pe̍h-ing(施豐櫻Si Hong-ing)
——————————————
窗前小鳥
thang-tsîng sió-tsiáu
美麗佮可愛
bí-lē kah khó-ài
雖然伊是每日
sui-jiân i sī muí-ji̍t
關在鳥籠內
kuinn tsāi tsiáu-láng lāi
毋過伊鳥聲快樂
m̄-koh i tsiáu-siann khuài-lo̍k
世事全毋知
sè-sīr tsuân m̄-tsai
毋知阮的悶悶的心內
m̄-tsai gún ê būn-būn ê sim-lāi
袂得親像可愛小鳥
buē-tit tshin-tshiūnn khó-ài sió-tsiáu
逍遙佮自在
siau-iâu kah tsīr-tsāi
可愛小鳥
khó-ài sió-tsiáu
人人都愛你
lâng-lâng to ài lí
你是每日快樂
lí sī muí-ji̍t khuài-lo̍k
揚揚佮得意
iông-iông kah tik-ì
美麗的鳥聲
bí-lē ê tsiáu-siann
吟出美麗的歌詩
gîm tshut bí-lē ê kua-si
可惜多愁青春的心理
khó-sioh to-tshiû tshing-tshun ê sim-lí
何時會得親像小鳥
hô-sî ē-tit tshin-tshiūnn sió-tsiáu
過著好春天
kè tio̍h hó tshun-thinn
雖然阮是
sui-jiân gún sī
青春的少女
tshing-tshun ê siàu-lír
有時毋知怎樣
ū-sî m̄-tsai tsuánn-iūnn
想甲心情挐
siūnn kah sim-tsîng lîr
可愛的窗前小鳥
khó-ài ê thang-tsîng sió-tsiáu
你是無想思
lí sī bô siūnn-sir
美麗鳥聲
bí-lē tsiáu-siann
親像好詩詞
tshin-tshiūnn hó si-sīr
只有你是時常
tsí-ū lí sī sî-siông
會得解人心內事
ē-tit kái lâng sim-lāi sīr
