跤步聲
《跤步聲》Kha-pōo-siann
林俊吉Lîm Tsùn-kiat
——————————————
一聲一聲跤步聲
tsi̍t-siann-tsi̍t-siann kha-pōo-siann
三步當做兩步行
sann-pōo tòng-tsuè nn̄g-pōo kiânn
彼是阮阿爸
he sī gún a-pah
少年的拍拚
siàu-liân ê phah-piànn
娶某生囝
tshuā-bóo sinn-kiánn
毋甘予阮哭一聲
m̄-kam hōo gún khàu tsi̍t-siann
一聲一聲跤步聲
tsi̍t-siann-tsi̍t-siann kha-pōo-siann
兩步當做三步行
nn̄g-pōo tòng-tsuè sann-pōo kiânn
彼是阮阿爸
he sī gún a-pah
中年的孤單
tiong-liân ê koo-tuann
囡仔出外
gín-á tshut-guā
向著天邊金金仔看
hiòng tio̍h thinn-pinn kim-kim-á khuànn
想起阿爸的一生
siūnn-khí a-pah ê it-sing
無依無倚無人晟
bô-i-bô-uá bô-lâng tshiânn
毋捌怨天怨運命
m̄-bat uàn thinn uàn ūn-miā
毋捌失志歹名聲
m̄-bat sit-tsì pháinn miâ-siann
啊~骨氣是伊的跤踏車
ah~ kut-khì sī i ê kha-ta̍h-tshia
載著理想四界行
tsài tio̍h lí-sióng sì-kè kiânn
阮是伊的行李啊
gún sī i ê hîng-lí–ah
大包細包疼命命
tuā-pau-sè-pau thiànn miā-miā
啊~骨氣是伊的跤踏車
ah~ kut-khì sī i ê kha-ta̍h-tshia
盤山過嶺攏毋驚
puânn-suann-kuè-niá lóng m̄-kiann
阮是世界上好命
gún sī sè-kài siōng hó-miā
大項細項伊來擔
tuā-hāng-sè-hāng i lâi tann
伊來擔
i lâi tann
—
一聲一聲跤步聲
tsi̍t-siann-tsi̍t-siann kha-pōo-siann
萬步當做一步行
bān-pōo tòng-tsuè tsi̍t-pōo kiânn
彼是阮阿爸
he sī gún a-pah
天頂輕輕仔行
thinn-tíng khin-khin-á kiânn
熟似背影
si̍k-sāi puē-iánn
離愈遠
lī jú hn̄g
心肝愈疼
sim-kuann jú thiànn
