鹽埕區長
《鹽埕區長》Iâm-tiânn-khu-tiúnn
李讚聲Lí Tsàn-siann(海野武沙)
——————————————
鹽埕區長郭萬枝
Iâm-tiânn-khu-tiúnn Keh Bān-ki
做人慷慨笑咪咪
tsuè-lâng khóng-khài tshiò bi-bi
忠孝親愛講誠意
tiong-hàu tshin-ài kóng sîng-ì
哎喲!幫助別人為村里
aih-ioh! pang-tsōo pa̍t-lâng uī tshuan-lí
鹽埕一片白波波
iâm-tiânn it-phiàn pe̍h pho-pho
風景美麗世間無
hong-kíng bí-lē sè-kan bô
朋友萬枝仔人緣好
pîng-iú Bān-ki–á jîn-iân hó
哎喲!村民毋敢看伊無
aih-ioh! tshuan-bîn m̄-kánn khuànn i bô
想起早前的流浪
siūnn-khí tsá-tsîng ê liû-lōng
前途遠景白茫茫
tsiân-tôo uán-kíng pe̍h-bông-bông
確實有話無地講
khak-si̍t ū uē bô-tè kóng
哎喲!人阮毋是愛放蕩
aih-ioh! lâng gún m̄-sī ài hòng-tōng
人生可比海波浪
jîn-sing khó-pí hái-pho-lōng
有時會起有時落
ū-sî ē khí ū-sî lo̍h
端正心理莫做錯
tuan-tsiànn sim-lí mài tsuè-tshò
哎喲!欲行大路平波波
aih-ioh! bueh kiânn tuā-lōo pînn pho-pho
人講錢銀是好寶
lâng kóng tsînn-gûn sī hó-pó
有錢使鬼會石磨
ū-tsînn sái kuí ē tsio̍h-bō
有錢人人佮你好
ū-tsînn lâng-lâng kah lí hó
哎喲!無錢目地人看無
aih-ioh! bô-tsînn ba̍k-tē lâng khuànn-bô
富在深山有遠親
hù tsāi tshim-san iú uán-tshin
貧在路邊無人認
pîn tsāi lōo-pinn bô-lâng jīn
虯儉粒積較要緊
khiû-khiām lia̍p-tsik khah iàu-kín
哎喲!免驚予人來看輕
aih-ioh! bián-kiann hōo-lâng lâi khuànn-khin
世間至寶是錢銀
sè-kan tsì-pó sī tsînn-gûn
會趁咱著會曉賰
ē thàn lán tio̍h ē-hiáu tshun
有錢欲食燒滾滾
ū tsînn bueh tsia̍h sio-kún-kún
哎喲!無錢忍寒閣龜仔龜孫
aih-ioh! bô tsînn jím kuânn koh ku-á-ku-sun
做人著愛有主張
tsuè-lâng to̍h-ài ū tsú-tiunn
好天著積雨來糧
hó-thinn tio̍h tsik hōo-lâi-niû
會趁咱著會曉守
ē thàn lán to̍h ē-hiáu tsiú
哎喲!才免共人伸長手
aih-ioh! tsiah bián kā lâng tshun-tn̂g-tshiú
三年一閏好歹輪
sann-nî tsi̍t-jūn hó-pháinn lûn
做人道德毋通損
tsuè-lâng tō-tik m̄-thang sún
高枕無憂真好睏
ko-tsím bû-iu tsin hó-khùn
哎喲!才免心肝咧紡車輪
aih-ioh! tsiah bián sim-kuann teh pháng tshia-lûn
世間金錢人人愛
sè-kan kim-tsînn lâng-lâng ài
人講有道才得財
lâng kóng iú-tō tsiah tit tsâi
不該愛得的毋通愛
put-kai ài tit–ê m̄-thang ài
哎喲!應該得的伊會來
aih-ioh! ing-kai tit–ê i ē lâi
