快樂的新娘
《快樂的新娘》Khuài-lo̍k ê Sin-niû
王秀如Ông Siù-jû
——————————————
一日等過又一日
tsi̍t-ji̍t tán kuè iū tsi̍t-ji̍t
今仔日已經欲出嫁
kia̋nn-ji̍t í-king beh tshut-kè
隔壁彼个千金小姐
keh-piah hit ê tshian-kim-sió-tsiá
出名生做真美麗
tshut-miâ sinn-tsuè bí-lē
所以彼个意愛郎君
sóo-í hit ê ì-ài lông-kun
才會對伊真痴迷
tsiah ē tuì i tsin tshi-bê
啊~意愛郎君
ah~ ì-ài lông-kun
才會對伊真痴迷
tsiah ē tuì i tsin tshi-bê
兩人講是踮河邊
nn̄g-lâng kóng sī tiàm hô-pinn
一見鍾情做情侶
it-kiàn tsiong-tsîng tsuè tsîng-lī
一个時期
tsi̍t-ê sî-kî
受人阻礙
siū-lâng tsóo-gāi
現在已經真順序
hiān-tsāi í-king tsin sūn-sī
所以彼日
sóo-í hit-ji̍t
兩人做陣
nn̄g-lâng tsuè-tīn
去辦嫁粧笑微微
khì pān-kè-tsng tshiò bî-bî
啊~兩人做陣
ah~ nn̄g-lâng tsuè-tīn
去辦嫁粧笑微微
khì pān-kè-tsng tshiò bî-bî
三年中間
sann-nî tiong-kan
怹兩人
in nn̄g-lâng
互相了解著心性
hōo-siong liáu-kái tio̍h sim-sìng
歡喜會得
huann-hí ē-tit
照著心願
tsiàu tio̍h sim-guān
無憂無慮心清清
bô-iu bô-lū sim tshing-tshing
所以厝邊
sóo-í tshù-pinn
人人期待
lâng-lâng kî-thāi
這對鴛鴦好前程
tsit tuì uan-iunn hó tsiân-tîng
啊~人人期待
ah~ lâng-lâng kî-thāi
這對鴛鴦好前程
tsit tuì uan-iunn hó tsiân-tîng
四邊圍著真濟人
sì-pinn uî tio̍h tsin tsuē lâng
新娘轎車紅記記
sin-niû kiau-tshia âng-kì-kì
祝福這對郎才女貌
tsiok-hok tsit tuì long-tsâi lú-māu
快樂笑聲響四邊
khuài-lo̍k tshiò-siann hiáng sì-pinn
所以兩人
sóo-í nn̄g-lâng
坐在車內
tsē tsāi tshia-lāi
心頭嗶噗跳袂離
sim-thâu phi̍t-pho̍k thiàu buē-lī
啊~坐在車內
ah~ tsē tsāi tshia-lāi
心頭嗶噗跳袂離
sim-thâu phi̍t-pho̍k thiàu buē-lī
