藍色的街燈
《藍色的街燈》Nâ-sik ê Ke-ting
尤君Iû Kun
——————————————
想昔日的燈下
siūnn sik-ji̍t ê ting-hā
雙人相?行
siang-lâng sio-tshuā kiânn
無疑今夜的燈下
bô-gî kim-iā ê ting-hā
變成孤單影
piàn-sîng koo-tuann iánn
遠遠的流水聲音
hn̄g-hn̄g ê lâu-tsuí siann-im
奏著苦戀歌
tsàu tio̍h khóo-luân kua
引阮想著遮歹命
ín gún siūnn-tio̍h tsiah pháinn-miā
啊~目屎流袂定
ah~ ba̍k-sái lâu buē-tiānn
若想著身軀邊
nā siūnn-tio̍h sin-khu-pinn
可愛的囝兒
khó-ài ê kiánn-jî
更加予阮的心肝
kìng-ka hōo gún ê sim-kuann
親像針咧刺
tshin-tshiūnn tsiam teh tshì
心愛的有情郎君
sim-ài ê ū-tsîng lông-kun
離開一兩年
lī-khui tsi̍t-nn̄g nî
毋知何時會相見
m̄-tsai hô-sî ē sann-kìnn
啊~愈想喉愈滇
ah~ jú siūnn âu jú tīnn
為金錢來所害
uī kim-tsînn lâi sóo hāi
雙人分東西
siang-lâng hun tang-sai
甜甜蜜蜜的情愛
tinn-tinn-bi̍t-bi̍t ê tsîng- ài
無人通了解
bô-lâng thang liáu-kái
走東西
tsáu tang-sai
無人同情
bô-lâng tông-tsîng
催阮流目屎
tshui gún lâu ba̍k-sái
想起命運遮爾䆀
siūnn-khí miā-ūn tsiah-nī bái
啊~感嘆獨悲哀
ah~ kám-thàn to̍k pi-ai
