天下最純情的女性
《天下最純情的女性》Thian-hā Tsuè Sûn-tsîng ê Lú-sìng
尤君Iû Kun
——————————————
自從阮彼一日
tsū-tsiông gún hit-tsi̍t-ji̍t
愛著伊了後
ài-tio̍h i liáu-āu
明知男性
bîng-tsai lâm-sìng
毋是完全靠得住
m̄-sī uân-tsuân khò tit tsū
阮也是一片痴情
gún iā-sī it-phiàn tshi-tsîng
毋願隨便放袂記
m̄-guān suî-piān pàng-buē-kì
這敢是這敢是
tse kám-sī tse kám-sī
一个天下純情的女性
tsi̍t-ê thian-hā sûn-tsîng ê lú-sìng
愛情是世間的
ài-tsîng sī sè-kan ê
權利與義務
khuân-lī í gī-bū
明明知男性
bîng-bîng tsai lâm-sìng
毋是全心有意思
m̄-sī tsuân-sim ū ì-sù
阮也是對伊痴情
gún iā-sī tuì i tshi-tsîng
毋願隨便反背伊
m̄-guān suî-piān huán-puē i
這就是這就是
tse tsiū-sī tse tsiū-sī
天下純情女性的真情
thian-hāsûn-tsîng lú-sìng ê tsin-tsîng
世間的男性
sè-kan ê lâm-sìng
是有情若無義
sī ū-tsîng ná bô-gī
明明知永遠
bîng-bîng tsai íng-uán
無心佮阮談情意
bô-sim kah gún tâm tsîng-ì
阮也是提出真意
gún iā-sī the̍h tshut tsin-ì
表示無伊我會死
piáu-sī bô i guá ē sí
這就是這就是
tse tsiū-sī tse tsiū-sī
天下純情女性的真情
thian-hāsûn-tsîng lú-sìng ê tsin-tsîng
