天涯母子情
《天涯母子情》Thian-gâi Bú-kiánn Tsîng
良一Liông-it
——————————————
伐出故鄉的跤步
hua̍h-tshut kòo-hiong ê kha-pōo
行向人生十字路
kiânn hiòng jîn-sing si̍p-jī-lōo
天邊的野鳥啼叫
thinn-pinn ê iá-tsiáu thî-kiò
一直擾亂阮心慒
it-ti̍t jiáu-luān gún sim tso
媽媽喲
má-mah–iooh
你揣無
lí tshuē-bô
害你目箍澹糊糊
hāi lí ba̍k-khoo tâm-kôo-kôo
原諒阮
guân-liōng gún
離鄉揣出路
lî-hiong tshuē tshut-lōo
望你保重喲
bāng lí pó-tiōng–iooh
看見海邊的砂埔
khuànn-kìnn hái-pinn ê sua-poo
敢是人生的中途
kám-sī jîn-sing ê tiong-tôo
黃昏的海鳥?迌
hông-hun ê hái-tsiáu tshit-thô
那飛那吼入山坡
ná pue ná háu ji̍p suann-pho
媽媽喲
má-mah–iooh
為你祈禱
uī lí kî-tó
這个時陣平安抑無
tsit ê sî-tsūn pîng-an ia̍h bô
夢著你孤單無人顧
bāng-tio̍h lí koo-tuann bô-lâng kòo
望你保重喲
bāng lí pó-tiōng–iooh
來到異鄉的場所
lâi-kàu ī-hiong ê tiûnn-sóo
才知人生的航路
tsiah tsai jîn-sing ê hâng-lōo
像飄浪海鳥脫逃
tshiūnn phiau-lōng hái-tsiáu thuat-tô
歡喜淚珠也流落
huann-hí luī-tsu iā lâu–lo̍h
媽媽喲
má-mah–iooh
免操勞
bián tshau-lô
天會助人無絕路
thinn ē tsōo lâng bô tsua̍t-lōo
等母囝相逢有倚靠
tán bú-kiánn siong-hông ū uá-khò
望你保重喲
bāng lí pó-tiōng–iooh
