堅強的男人
《堅強的男人》Kian-kiông ê Lâm-jîn
李明洋Lí Bîng-iông
——————————————
日頭驚黃昏
ji̍t-thâu kiann hông-hun
月娘驚天光
gue̍h-niû kiann thinn kng
我驚手若酸
guá kiann tshiú nā sng
厝內就無三頓
tshù-lāi tiō bô sann-tǹg
看恁恬恬仔睏
khuànn lín tiām-tiām-á khùn
人生較苦也甘願吞
jîn-sing khah khóo iā kam-guān thun
我無怨嘆命運
guá bô uàn-thàn miā-ūn
後悔肩頭擔雙份
hiō-hué king-thâu tann siang-hūn
放伊去
pàng i khì
我無傷心的身份
guá bô siong-sim ê sin-hūn
我的心毋敢歇睏
guá ê sim m̄-kánn hioh-khùn
對恁的愛
tuì lín ê ài
我無分寸
guá bô hun-tshùn
因為我欠恁親情一分
in-uī guá khiàm lín tshin-tsiânn tsi̍t-hun
恁的聲解我心酸
lín ê siann kái guá sim sng
恁的笑治我手軟
lín ê tshiò tī guá tshiú nńg
咱的厝
lán ê tshù
毋願充滿著怨恨
m̄-guān tshiong-buán tio̍h uàn-hūn
就算枕頭孤單睏
tiō-sǹg tsím-thâu koo-tuann khùn
永遠毋放囝兒孫
íng-uán m̄-pàng kiánn-jî-sun
這雙手
tsit siang-tshiú
只有堅強的傷痕
tsí-ū kian-kiông ê siong-hûn
