漏電的插頭
《漏電的插頭》⠀
⠀
過去的往事 飄飄落落在我的眼前，⠀
想欲越頭爭取 有啥路用。⠀
受壓迫的男性負擔未婚的哀怨悲情，⠀
失去了笑容抱囝聽候時機。⠀
目睭若擘無金，烏暗中如何看見，⠀
揣出失敗的原因，莫閣吐大氣。⠀
講出了緣分，攏怪阮一時糊塗，⠀
就袂來造成這馬的傷害。⠀
春夢留痕坎坷青春，甘願忍受孤單的滋味，⠀
少年的日子怎樣安排。⠀
親像漏電的電火插頭，塑膠橐仔約束兩塊菜頭，⠀
過去山盟海誓疼入心肝。⠀
苦勸咱囡仔著愛注意，佮人合作愛較細膩，⠀
毋通做事遮爾衝碰，事先預防閣無準備。⠀
為怎樣哪會如此放蕩，大人的代誌攏真好奇，⠀
走火機關銃，漏電的插頭，是悲劇的開始，⠀
規身軀虛肭肭，按怎進前，心內蓋歹勢。⠀
⠀
《Lāu-tiān ê Tshah-thâu》⠀
⠀
Kuè-khì ê óng-sū, phiau-phiau-lo̍k-lo̍k tsāi guá ê gán-tsîng,⠀
Siūnn-beh ua̍t-thâu tsing-tshú ū siánn lōo-īng.⠀
Siū ap-pik ê lâm-sìng hū-tam bī-hun ê ai-uàn pi-tsîng,⠀
sit-khì liáu tshiò-iông phō-kiánn thìng-hāu sî-ki.⠀
Ba̍k-tsiu nā peh bô kim, oo-àm tiong lû-hô khuànn-kìnn,⠀
tshuē tshut sit-pāi ê guân-in, mài koh thóo-tuā-khuì.⠀
Kóng tshut liáu iân hūn, lóng kuài gún tsi̍t-sî hôo-tôo,⠀
tiō buē lâi tsō-sîng tsit-má ê siong-hāi.⠀
Tshun-bāng lâu hûn khám-khia̍t tshing-tshun, kam-guān lím-siū koo-tuann ê tsu-bī,⠀
siàu-liân ê ji̍t-tsí tsuánn-iūnn an-pâi.⠀
Tshin-tshiūnn lāu-tiān ê tiān-hué tshah-thâu, sok-ka-lok-á iok-sok nn̄g tè tshài-thâu, ⠀
kuè-khì san-bîng-hái-sè thiànn ji̍p sim-kuann.⠀
Khóo-khǹg lán gín-á tio̍h ài tsù-ì, kah lâng ha̍p-tsok ài khah sè-lī, ⠀
m̄-thang tsò-sū tsiah-nī tshóng-pōng, sū-sian ī-hông koh bô tsún-pī.⠀
Uī-tsuánn-iūnn nà ē lû-tshú hòng-tōng, tuā-lâng ê tāi-tsì lóng tsin hònn-kî,⠀
tsáu-hué ki-kuan-tshìng, lāu-tiān ê tshah-thâu, sī pi-kio̍k ê khai-sí,⠀
kui-sin-khu hi-lè-lè, án-tsuánn tsìn-tsîng, sim-lāi kài pháinn-sè.⠀
