牽手做陣行
《牽手做陣行》Khan-tshiú Tsuè-tīn Kiânn
江明學Kang Bîng-ha̍k
——————————————
越頭看人生路
ua̍t-thâu khuànn jîn-sing-lōo
雄雄已經過一半
hiông-hiông í-king kuè tsi̍t-puànn
青春歲月
tshing-tshun suè-gua̍t
親像雲過山
tshin-tshiūnn hûn kuè suann
少年夢
siàu-liân bāng
夢成空
bāng sîng khang
險險行入烏暗城
hiám-hiám kiânn-ji̍p oo-àm siânn
你的出現
lí ê tshut-hiān
改變我稀微的生活
kái-piàn guá hi-bî ê sing-ua̍h
感謝你一路陪伴我
kám-siā lí tsi̍t-lōo puê-phuānn guá
無論風雨偌大
bô-lūn hong-hōo guā tuā
有你陪佇我的身邊
ū lí puê tī guá ê sin-pinn
我就袂閣再孤單
guá tiō buē koh-tsài koo-tuann
原來幸福的感覺
guân-lâi hīng-hok ê kám-kak
是快樂的溫泉
sī khuài-lo̍k ê un-tsuânn
有你陪佇我的身邊
ū lí puê tī guá ê sin-pinn
咱的心情真快活
lán ê sim-tsîng tsin khuìnn-ua̍h
唱一條幸福的戀歌
tshiùnn tsi̍t-tiâu hīng-hok ê luân-kua
牽手做陣行
khan-tshiú tsuè-tīn kiânn
