十盆牡丹歌
《十盆牡丹歌》Tsa̍p-phûn Bóo-tan Kua
——————————————
一、
一盆牡丹在城牆
tsi̍t phûn bóo-tan tsāi siânn-tshiûnn
南風吹來芳麝香
lâm-hong tshue lâi phang siā-hiunn
日夜人我都咧想
ji̍t-iā lâng guá to teh siūnn
哎喲!無疑今日來見娘
aih-ioh! bô-gî kim-ji̍t lâi kìnn niû
二、
無疑今日再相會
bô-gî kim-ji̍t tsài siong-huē
因為來看牡丹花
in-uī lâi khuànn bóo-tan-hue
?迌情意在人做
thit-thô tsîng-ì tsāi-lâng tsuè
哎喲!恨咱袂得通交陪
aih-ioh! hūn lán buē-tit thang kau-puê
三、
兩盆牡丹在城頂
nn̄g phûn bóo-tan tsāi siânn-tíng
風吹芳過幾十間
hong tshue phang kuè kuí-tsa̍p king
日夜思想上僥倖
ji̍t-iā su-siūnn siōng hiau-hīng
哎喲!佮你做堆袂得成
aih-ioh! kah lí tsuè-tui buē-tit sîng
四、
驚你嫌我無對範
kiann lí hiâm guá bô tuì-pān
因為咱來看牡丹
in-uī lán lâi khuànn bóo-tan
人我想著真怨嘆
lâng guá siūnn-tio̍h tsin uàn-thàn
哎喲!做堆兩字真為難
aih-ioh! tsuè-tui nn̄g-jī tsin uî-lân
五、
三盆牡丹排三位
sann phûn bóo-tan pâi sann-uī
鼻著清芳心頭開
phīnn-tio̍h tshing-phang sim-thâu khui
看娘面肉幼閣媠
khuànn niû bīn-bah iù koh suí
哎喲!無疑今日閣做堆
aih-ioh! bô-gî kim-ji̍t koh tsuè-tui
六、
牡丹花園好遊賞
bóo-tan hue-hn̂g hó iû-siúnn
無疑君仔挵著娘
bô-gî kun-á lòng-tio̍h niû
袂得做堆欲怎樣
buē-tit tsuè-tui bueh tsuánn-iūnn
哎喲!想著心肝真憂愁
aih-ioh! siūnn-tio̍h sim-kuann tsin iu-tshiû
七、
四盆牡丹正含蕊
sì phûn bóo-tan tsiànn hâm-luí
一欉寒梅猶未開
tsi̍t tsâng hân-muî iáu-buē khui
文三欣羨娘仔媠
Bûn-sam him-siān niû-á suí
哎喲!含情毋吐上克虧
aih-ioh! hâm-tsîng put thóo siōng khik-khui
八、
驚你講話會無影
kiann lí kóng-uē ē bô-iánn
若無棄嫌你常來遮
nā bô khì-hiâm lí siông lâi tsia
會得做堆誠好命
ē-tit tsuè-tui tsiânn hó-miā
哎喲!娘仔不時思念兄
aih-ioh! niû-á put-sî su-liām hiann
九、
五盆牡丹清芳味
gōo phûn bóo-tan tshing-phang bī
臺北芳到水里坑
Tâi-pak phang kàu Tsuí-ní-khinn
予阮那看那佮意
hōo gún ná khuànn ná kah-ì
哎喲!我是驚娘你毋知
aih-ioh! guá sī kiann niû lí m̄-ti
十、
文兄講話真過謙
Bûn-hiann kóng-uē tsin kòo-khiam
可比牡丹誰敢嫌
khó-pí bóo-tan siáng kánn hiâm
人我對你真思念
lâng guá tuì lí tsin su-liām
哎喲!心肝佮兄生相黏
aih-ioh! sim-kuann kah hiann sinn sio-liâm
十一、
六盆牡丹平大蕊
la̍k phûn bóo-tan pînn tuā luí
著照時陣才會開
tio̍h tsiàu sî-tsūn tsiah ē khui
我看小娘體格媠
guá khuànn sió-niû thé-keh suí
哎喲!拄好大漢袂傷肥
aih-ioh! tú-hó tuā-hàn buē siunn puî
十二、
恨我生做遮㾀勢
hūn guá sinn-tsuè tsiah khiap-sì
㾀勢娘仔誰欲挃
khiap-sì niû-á siáng bueh ti̍h
阮是驚君你無佮意
gún sī kiann kun lí bô kah-ì
哎喲!若欲做堆驚無時
aih-ioh! nā beh tsuè-tui kiann bô-sî
十三、
七盆牡丹平平大
tshit phûn bóo-tan pînn-pînn tuā
花跤含塗頂面沙
hue-kha hâm thôo tíng-bīn sua
人我並無注意看
lâng guá pīng bô tsù-ì khuànn
哎喲!無彩小娘目神活
aih-ioh! bô-tshái sió-niû ba̍k-sîn ua̍h
十四、
感謝文三?呵咾
kám-siā Bûn-sam gâu o-ló
娘仔敢會較媠哥
niû-á kám ē khah suí ko
人緣你比阮較好
lâng-iân lí pí gún khah hó
哎喲!阮是頭尖喙脣薄
aih-ioh! gún sī thâu tsiam tshuì-tûn po̍h
十五、
八盆牡丹做一排
peh phûn bóo-tan tsuè tsi̍t-pâi
唐山種子提來栽
Tn̂g-suann tsíng-tsí the̍h-lâi tsai
看著心想誠意愛
khuànn-tio̍h sim siūnn tsiânn ì-ài
哎喲!恐驚參詳袂得來
aih-ioh! khióng-kiann tsham-siông buē-tit lâi
十六、
免驚參詳袂承領
bián-kiann tsham-siông buē sîng-líng
月老紅線牽註定
gue̍h-nóo âng-suànn khan tsù-tīng
佮君毋是用喙反
kah kun m̄-sī iōng tshuì píng
哎喲!你我參考好感情
aih-ioh! lí guá tsham-khó hó kám-tsîng
十七、
九盆牡丹真媠色
káu phûn bóo-tan tsin suí-sik
斟酌共看才明白
tsim-tsiok kā khuànn tsiah bîng-pi̍k
共娘推辭無利益
kā niû the-sî bô lī-ik
哎喲!到遮全部攏明白
aih-ioh! kàu tsia tsuân-pōo lóng bîng-pi̍k
十八、
我講真言佮真語
guá kóng tsin giân kah tsin gí
毋是佮兄說詞虛
m̄-sī kah hiann sueh sû hi
驚兄緣份配袂起
kiann hiann iân-hūn phuè buē-khí
哎喲!毋是小娘咧推辭
aih-ioh! m̄-sī sió-niû teh the-sî
十九、
十盆牡丹齊齊備
tsa̍p phûn bóo-tan tsiâu tsê-pī
鼻著清芳好芳味
phīnn-tio̍h tshing-phang hó phang-bī
想著實在真厭氣
siūnn-tio̍h si̍t-tsāi tsin iàn-khì
哎喲!見笑滿面紅記記
aih-ioh! kiàn-siàu muá-bīn âng-kì-kì
廿、
人阮生成遮爾䆀
lâng gún senn-sîng tsiah-nī bái
阮的正跤又閣跛
gún ê tsiànn-kha iū-koh pái
我共文兄你交代
guá kā Bûn-hiann lí kau-tài
哎喲!小鬼毋敢弄金獅
aih-ioh! sió-kuí m̄-kánn lāng kim-sai
