酒女中的酒女
《酒女中的酒女》Tsiú-lú Tiong ê Tsiú-lú
尤君Iû Kun
——————————————
↓↓—(口白)—↓↓
表面上的笑容
piáu-bīn-siōng ê tshiò-iông
顯示心內心疼的幸福
hián-sī sim-lāi sim-thiànn ê hīng-hok
但是環境壓迫著阮女性
tān-sī khuân-kíng ap-pik tio̍h gún lú-sìng
唉!酒酒閣再一杯來啦
haih! tsiú, tsiú koh-tsài tsi̍t-pue lâi–lah
↑↑—(口白)—↑↑
阮運命由天來安排
gún ūn-miā iû thinn lâi an-pâi
女性的終身不幸
lú-sìng ê tsiong-sin put-hīng
偏偏是為著愛
phian-phian sī uī-tio̍h ài
苦澀的薰酒味
khóo-siap ê hun-tsiú-bī
加添阮的心痛苦
ka-thiam gún ê sim thòng-khóo
相信我
siong-sìn guá
無醉喲無醉喲無醉啦
bô tsuì–iooh bô tsuì–iooh bô tsuì–lah
放袂記
pàng-buē-kì
過去眠夢放袂記
kè-khì bîn-bāng pàng-buē-kì
每日來裝著笑容
muí-ji̍t lâi tsng tio̍h tshiò-iông
歡喜過日子
huann-hí kè ji̍t-tsí
↓↓—(口白)—↓↓
男性的僥雄
lâm-sìng ê hiau-hiông
愛情的苦楚
ài-tsîng ê khóo-tshóo
只有薰酒
tsí-ū hun-tsiú
會得予我暫時放袂記得
ē-tit hōo guá tsiām-sî pàng-buē-kì–eh
拜託咧
pài-thok–leh
酒酒閣再一杯予我啦
tsiú, tsiú koh-tsài tsi̍t-pue hōo guá–lah
↑↑—(口白)—↑↑
何必著閣再來痴情
hô-pit tio̍h koh-tsài lâi tshi-tsîng
女性的一生
lú-sìng ê it-sing
敢是應該著裝媠媠
kám-sī ing-kai tio̍h tsng suí-suí
苦澀的愛情味
khóo-siap ê ài-tsîng bī
加添阮的心傷悲
ka-thiam gún ê sim siong-pi
相信我
siong-sìn guá
無醉喲無醉喲無醉啦
bô tsuì–iooh bô tsuì–iooh bô tsuì–lah
放袂記假情假意
pàng-buē-kì ké-tsîng ké-ì
放袂記
pàng-buē-kì
每日酒來啉醉醉
muí-ji̍t tsiú lâi lim tsuì-tsuì
裝笑過日子
tsng-tshiò kè ji̍t-tsí
眠夢中叫著你名字
bîn-bāng tiong kiò tio̍h lí miâ-jī
醒來時才知酒醉
tshínn–lâi sî tsiah tsai tsiú-tsuì
暗暗來流珠淚
àm-àm lâi lâu tsu-luī
消失的青春夢
siau-sit ê tshing-tshun-bāng
增加阮的心悲哀
tsing-ka gún ê sim pi-ai
相信我
siong-sìn guá
無醉喲無醉喲無醉啦
bô tsuì–iooh bô tsuì–iooh bô tsuì–lah
相信我
siong-sìn guá
真情真意愛著你
tsin-tsîng tsin-ì ài-tio̍h lí
每日是寂寞稀微
muí-ji̍t sī tsi̍k-bo̍k hi-bî
傷心過日子
siong-sim kè ji̍t-tsí
