阿母的手路菜
《阿母的手路菜》A-bú ê Tshiú-lōo-tshài
于台煙Î Tâi-ian
——————————————
食著阿母的手路菜
tsia̍h-tio̍h a-bú ê tshiú-lōo-tshài
才知偌久無轉來
tsiah tsai guā kú bô tńg–lâi
佇外面
tī guā-bīn
我有真拍拚
guá ū tsin phah-piànn
是環境不如意
sī khuân-kíng put-jû-ì
無法度陪心肝
bô-huat-tōo puê sim-kuann
袂當予你看覓
buē-tàng hōo lí khuànn-māi
蓋著細漢的棉被
kah tio̍h sè-hàn ê mî-phuē
享受阿母溫暖的愛
hiáng-siū a-bú un-luán ê ài
有偌久
ū guā kú
咱無睏仝一領被
lán bô khùn kāng tsi̍t-niá phuē
想當初
siūnn tong-tshoo
不應該
put ing-kai
毋知體會著你的愛
m̄-tsai thé-huē tio̍h lí ê ài
予親情造成著遺憾
hōo tshin-tsîng tsō-sîng tio̍h uî-hām
如今我轉來
jû-kim guá tńg–lâi
無論成功抑失敗
bô-lūn sîng-kong ia̍h sit-pāi
這个時陣的我
tsit ê sî-tsūn ê guá
才來體會你的愛
tsiah lâi thé-huē lí ê ài
望時間袂傷慢
bāng sî-kan buē siunn bān
予時間過較慢
hōo sî-kan kuè khah bān
我願予你溫暖的愛
guá guān hōo lí un-luán ê ài
雙手牽
siang-tshiú khan
