故鄉的故事
《
》Kòo-hiong ê Kòo-sū
七郎Tshit-lông
——————————————
歡喜炕塗窯啊
huann-hí khòng-thôo-iô–ah
去放風吹
khì pàng hong-tshue
想故鄉的故事
siūnn kòo-hiong ê kòo-sū
真正笑詼
tsin-tsiànn tshiò-khue
–
為著厝內大大細細
uī-tio̍h tshù-lāi tuā-tuā-sè-sè
出外來拚經濟
tshut-guā lâi piànn king-tsè
雖然他鄉
sui-jiân thann-hiong
有漢堡菜頭粿
ū hànbǎo tshài-thâu-kué
較懷念鹹魚番薯糜
khah huâi-liām kiâm-hî han-tsî-muê
故鄉的故事真正濟
kòo-hiong ê kòo-sū tsin-tsiànn tsuē
炕塗窯食土雞
khòng thôo-iô tsia̍h thóo-ke
掠鱔魚佮釣水雞
lia̍h siān-hî kah tiò tsuí-ke
心肝想的
sim-kuann siūnn–ê
攏是故鄉的一切
lóng-sī kòo-hiong ê it-tshè
厝內的序大人
tshù-lāi ê sī-tuā-lâng
年歲也已經濟
nî-huè iā í-king tsuē
請恁愛保重身體
tshiánn lín ài pó-tiōng sin-thé
工課我會認真做
khang-khuè guá ē jīn-tsin tsuè
希望早日成功
hi-bāng tsá-ji̍t sîng-kong
轉去陪恁泡老人茶
tńg-khì puê lín phàu lāu-lâng-tê
