午夜的戀歌
《午夜的戀歌》Ngóo-iā ê Luân-kua
七郎Tshit-lông
——————————————
今夜的風遮冷利
kim-iā ê hong tsiah líng-lāi
吹甲我會起畏寒
tshue kah guá ē khí uì-kuânn
思慕的美麗形影
su-bōo ê bí-lē hîng-iánn
盈暗佇咧啥人遐
îng-àm tī-leh siánn-lâng hia
月娘啊你敢知影
ge̍h-niû–ah lí kám tsai-iánn
人重感情
lâng tiōng kám-tsîng
煞守孤單
suah siú koo-tuann
敢是我有較軟汫
kám-sī guá ū khah nńg-tsiánn
致使感情來變卦
tì-sú kám-tsîng lâi piàn-kuà
愁夜的孤戀影
tshiû-iā ê koo-luân iánn
絕唱吉他拍斷線
tsua̍t-tshiùnn gì-tah phah-tn̄g suànn
我敢著繼續彈
guá kám tio̍h kè-sio̍k tuânn
我心真疼
guá sim tsin thiànn
有夠後悔
ū-kàu hiō-hué
凝甲捶心肝
gîng kah tuî-sim-kuann
午夜戀歌唱煞
ngóo-iā luân-kua tshiùnn suah
猶原孤單
iu-guân koo-tuann
