路滑滑
《路滑滑》Lōo Ku̍t-ku̍t
劉素娥 Lâu Sòo-ngôo
——————————————
雨紛紛啊路滑啊滑
ú hun-hun–ah lōo ku̍t–ah ku̍t
塗泥滿地沐著裙
thôo-nî muá-tē bak tio̍h kûn
艱苦行也罔忍
kan-khóo kiânn~ iā bóng lún
為著欲揣貼心君
uī-tio̍h beh tshē tah-sim kun
若愛唷為著欲揣貼心君
nā ài–iooh uī-tio̍h beh tshē tah-sim kun
雨紛紛啊路滑啊滑
ú hun-hun–ah lōo ku̍t–ah ku̍t
想欲倒轉心憂悶
siūnn-beh tò-tńg sim iu-būn
孤單行也罔忍
koo-tuann kiânn~ iā bóng lún
為著情份心難分
uī-tio̍h tsîng-hūn sim lân hun
若愛唷為著情份心難分
nā ài–iooh uī-tio̍h tsîng-hūn sim lân hun
雨紛紛啊路滑啊滑
ú hun-hun–ah lōo ku̍t–ah ku̍t
月光微微照路痕
ge̍h-kng bî-bî tsiò lōo-hûn
狗咧吠也罔忍
káu teh puī~ iā bóng lún
為何招來揣無君
uī-hô tsiau lâi tshē bô kun
若愛唷為何招來揣無君
nā ài–iooh uī-hô tsiau lâi tshē bô kun
