男兒嘆
《男兒嘆》Lâm-jî Thàn
歐禮全 Au Lé-tsuân
——————————————
想著你一个人
siūnn tio̍h lí tsi̍t-ê lâng
暗流目屎滴
àm-lâu ba̍k-sái tih
做男兒對著情愛
tsuè lâm-jî tuì tio̍h tsîng-ài
已經無趣味
í-king bô tshù-bī
自彼日你來
tsū hit-ji̍t lí lâi
離開阮的身邊
lī-khui gún ê sin-pinn
阮就來失了意志
gún tsiū lâi sit liáu ì-tsì
雖然你無反背
sui-jiân lí bô huán-puē
咱純真的心意
lán sûn-tsin ê sim-ì
為家庭來束縛
uī ka-tîng lâi sok-pa̍k
雙人無自由
siang-lâng bô tsū-iû
做男兒失了希望
tsuè lâm-jî sit liáu hi-bāng
暝日心憂愁
mî-ji̍t sim iu-tshiû
經過的情景
king-kuè ê tsîng-kíng
你的彼對目睭
lí ê hit tuì ba̍k-tsiu
引起阮綿綿再想
ín-khí gún mî-mî tsài siūnn
雖然你已經來
sui-jiân lí í-king lâi
做別人的新娘
tsuè pa̍t-lâng ê sin-niû
孤一个心茫茫
koo tsi̍t-ê sim bâng-bâng
行來溪岸邊
kiânn lâi khe-huānn-pinn
做男兒見景傷情
tsuè lâm-jî kiàn-kíng siong-tsîng
大氣吐袂離
tuā-khuì thòo buē-lī
咱彼日踮遮
lán hit-ji̍t tiàm tsia
約束無變心志
iok-sok bô-piàn sim-tsì
來看著流水青青
lâi khuànn tio̍h lâu-tsuí tshinn-tshinn
雖然你來辜負
sui-jiân lí lâi koo-hū
咱堅定的情義
lán kian-tīng ê tsîng-gī
