風雨夜曲
《風雨夜曲》Hong-ú Iā-khik
鳳飛飛Hōng Hui-hui
——————————————
微微燈火
bî-bî ting-hué
照著樓窗
tsiò tio̍h lâu-thang
霜風鑽入房
sng-hong tsǹg-ji̍p pâng
房中獨有阮一人
pâng-tiong to̍k ū gún tsi̍t-lâng
靜靜解心意
tsīng-tsīng kái sim-ì
只有茶味芳
tsí-ū tê-bī phang
砛簷雨水
gîm-tsînn hōo-tsuí
嗤嗤㴙㴙
tshi-tshi-tsha̍p-tsha̍p
增加阮苦痛
tsing-ka gún khóo-thàng
風雨無停
hong-ú bô thîng
心情又飄動
sim-tsîng iū phiau-tāng
往年所有的希望
óng-nî sóo-ū ê hi-bāng
犧牲到現在
hi-sing kàu hiān-tsāi
伊毋願來放鬆
i m̄-guān lâi pàng-sang
毋願變成一場夢
m̄-guān piàn-sîng tsi̍t-tiûnn bāng
想起昔日年青時代
siūnn-khí sik-ji̍t liân-tshing sî-tāi
世情阮毋知
sè-tsîng gún m̄-tsai
只知義務佮情愛
tsí tsai gī-bū kah tsîng-ài
過著重疊疊
kuè tio̍h tîng-tha̍h-tha̍h
人生的苦海
jîn-sing ê khóo-hái
並無希望爽爽快快
pīng bô hi-bāng sóng-sóng-khuài-khuài
快樂度生涯
khuài-lo̍k tōo sing-gâi
只求美滿熱情永存在
tsí kiû bí-buán jia̍t-tsîng íng tsûn-tsāi
可比陽春花當開
khó-pí iông-tshun hua tong-khai
無疑運命歹
bô-gî ūn-miā pháinn
怨嘆啥人知
uàn-thàn siánn-lâng tsai
變成寂寞暗悲哀
piàn-sîng tsi̍k-bo̍k àm pi-ai
冬天暝長
tang-thinn mî tn̂g
夜半沉靜
iā-puànn tîm-tsīng
風雨又無停
hong-ú iū bô thîng
想著鬱卒的世情
siūnn-tio̍h ut-tsut ê sè-tsîng
受盡千萬般
siū tsīn tshian-bān puann
艱難的苦境
kan-lân ê khóo-kíng
並無希望永永遠遠
pīng bô hi-bāng íng-íng-uán-uán
快樂佮虛榮
khuài-lo̍k kah hi-îng
只求美滿光明的前程
tsí kiû bí-buán kong-bîng ê tsiân-tîng
哪知四面是風湧
ná tsai sì-bīn sī hong-íng
加添阮心悶
ka-thiam gún sim-būn
啥人來造成
siánn-lâng lâi tsō-sîng
冷暖世情的人生
líng luán sè-tsîng ê jîn-sing
