相思嘆
《相思嘆》Siunn-si Thàn
鳳飛飛 Hōng Hui-hui
——————————————
月色當光照紗窗
ge̍h-sik tng kng tsiò se-thang
感覺有欠項
kám-kak ū khiàm-hāng
相思過頭暝日夢
siunn-si kuè-thâu mî-ji̍t bāng
心酸欲等你一人
sim sng bueh tán lí tsi̍t-lâng
離開遐久敢無望
lī-khui hiah kú kám bô-bāng
害阮守空房
hāi gún tsiú khang-pâng
孤單憂愁在床內
koo-tuann iu-tshiû tsāi tshn̂g-lāi
梳妝看鏡台
se-tsng khuànn kiànn-tâi
面肉消瘦攏毋知
bīn-bah siau-sán lóng m̄-tsai
怨恨阮命流目屎
uàn-hūn gún miā lâu ba̍k-sái
我君何時會轉來
guá-kun hô-sî ē tńg–lâi
替阮想看覓
thè gún siūnn khuànn-māi
等君無轉暝日吼
tán kun bô tńg mî-ji̍t háu
病症強欲到
pīnn-tsìng kiōng-bueh kàu
房內暗暗目屎流
pâng-lāi àm-àm ba̍k-sái lâu
何時相會來阮兜
hô-sî siong-huē lâi gún-tau
煩惱年歲年年老
huân-ló nî-huè nî-nî lāu
我君無越頭
guá-kun bô ua̍t-thâu
煩惱年歲年年老
huân-ló nî-huē nî-nî lāu
我君無越頭
guá-kun bô ua̍t-thâu
