阿必仔的心事
《阿必仔的心事》A-pit–á ê Sim-sū
詹雅雯Tsiam Ngá-bûn
——————————————
天未光
thinn buē kng
狗未吠
káu buē puī
趕緊出門來做工
kuánn-kín tshut-mn̂g lâi tsuè-kang
大粒汗
tuā lia̍p kuānn
細粒汗
suè lia̍p kuānn
滴甲身軀臭黏黏
tih kah sin-khu tshàu liâm-liâm
日頭炎炎
ji̍t-thâu iām-iām
人是忝忝
lâng sī thiám-thiám
皮膚曝甲鹹鹹
phuê-hu pha̍k kah kiâm-kiâm
阿必仔的心事
A-pit–á ê sim-sū
誰來聽恁唸
siáng lâi thiann lín liām
開銀行抑是做女工
khui gîn-hâng ia̍h-sī tsuè lú-kang
逐家命運攏無仝
ta̍k-ke miā-ūn lóng bô-kāng
管待啥物歹年冬
kuán-thāi sánn-mih pháinn-nî-tang
拍拚有美夢
phah-piànn ū bí-bāng
開餐廳抑是做頭鬃
khui tshan-thiann ia̍h-sī tsuè thâu-tsang
逐家命運攏無仝
ta̍k-ke miā-ūn lóng bô-kāng
咱是認份
lán sī jīn-hūn
戇戇的天公仔囝
gōng-gōng ê thinn-kong-á-kiánn
向望天疼戇人
ǹg-bāng thinn thiànn gōng-lâng
毋管生活按怎苦
m̄-kuán sing-ua̍h án-tsuánn khóo
三頓嘛是愛罔度
sann-tǹg mā sī ài bóng-tōo
錢歹趁
tsînn pháinn thàn
做工人
tsuè-kang-lâng
心情盡量放輕鬆
sim-tsîng tsīn-liōng pàng khin-sang
暗風涼涼
àm-hong liâng-liâng
腹肚空空
pak-tóo khang-khang
想著厝內上溫暖
siūnn-tio̍h tshù-lāi siōng un-luán
阿必仔的心事
A-pit–á ê sim-sū
我來聽恁唸
guá lâi thiann lín liām
