思念線
《思念線》Su-liām Suànn
詹曼鈴Tsiam Bān-lîng
——————————————
踮心內上深的疼
tiàm sim-lāi siōng tshim ê thiànn
親像針咧鑽心肝
tshin-tshiūnn tsiam teh tsǹg sim-kuann
不時出現在深夜
put-sî tshut-hiān tsāi tshim-iā
陣陣傷心陣陣寒
tsūn-tsūn siong-sim tsūn-tsūn kuânn
踮心內有一種疼
tiàm sim-lāi ū tsi̍t-tsióng thiànn
是阮上深的牽掛
sī gún siōng tshim ê khian-kuà
不管時攏提醒我
put-kuán-sî lóng thê-tshínn guá
你是我身軀的血肉
lí sī guá sin-khu ê hueh-bah
今生無緣做伴
kim-sing bô-iân tsuè-phuānn
袂當同齊做陣行
buē-tàng tâng-tsê tsuè-tīn kiânn
破碎悲慘的運命
phuà-tshuì pi-tshám ê ūn-miā
孤單的影隻
koo-tuann ê iánn-tsiah
想你的形影
siūnn lí ê hîng-iánn
鹹酸苦澀已經滿
kiâm-sng khóo-siap í-king muá
拜託天頂月娘啊
pài-thok thinn-tíng gue̍h-niû–ah
替阮共伊問一聲
thè gún kā-i mn̄g–tsi̍t-siann
思念親像一條線
su-liām tshin-tshiūnn tsi̍t-tiâu suànn
綿綿長
mî-mî tn̂g
欲剪
beh tsián
斷袂煞
tn̄g buē-suah
