三年前的我
《三年前的我》Sann-nî Tsîng ê Guá
葉啟田 Ia̍p Khé-tiân
——————————————
佮伊來拆散
kah i lâi thiah-suànn
已經三年外
í-king sann-nî guā
怨嘆阮運命
uàn-thàn gún ūn-miā
欲講心痛疼
bueh kóng sim thàng-thiànn
↓↓(口白)—(口白)—(口白)↓↓
想起著三年前的我
siūnn-khí tio̍h sann-nî tsîng ê guá
被一位女性來放捒
pī tsi̍t-uī lú-sìng lâi pàng-sak
一時目睭來失明
tsi̍t-sî ba̍k-tsiu lâi sit-bîng
枴仔煞攑顛倒反
kuái-á suah gia̍h tian-tò-píng
紅單看做手形
âng-tuann khuànn-tsuè tshiú-hîng
便所看做涼亭
piān-sóo khuànn-tsuè liâng-tîng
剃頭店當做洗面間
thì-thâu-tiàm tòng-tsuè sé-bīn-king
豬砧當做眠床頂
ti-tiam tòng-tsuè bûn-tshn̂g-tíng
墓仔埔看做是
bōng-á-poo khuànn-tsuè sī
咱兩人永遠的家庭
lán nn̄g-lâng íng-uán ê ka-tîng
啊!我哪會遮爾僥倖
ah! guá ná ē tsiah-nī hiau-hīng
↑↑(口白)—(口白)—(口白)↑↑
你也有咒誓
lí iā ū tsiù-tsuā
偏偏違背我
phian-phian uî-puē guá
害著我今日
hāi-tio̍h guá kim-ji̍t
為情來拖磨
uī tsîng lâi thua-buâ
↓↓(口白)—(口白)—(口白)↓↓
彼年的八月十五夜
hit nî ê peh-gue̍h tsa̍p-gōo iā
相招去海邊
sio-tsio khì hái-pinn
踮在石頭跤
tiàm-tsāi tsio̍h-thâu kha
當天你我有咒誓
tng-thinn lí guá ū tsiù-tsuā
你無嫁我無娶
lí bô kè guá bô tshuā
無疑當咧欲兩年外
bô-gî tng tih-beh nn̄g-nî guā
你的腹肚
lí ê pak-tóo
煞一日一日大
suah tsi̍t-ji̍t tsi̍t-ji̍t tuā
今仔日你來誤我
kin-á-ji̍t lí lâi gōo guá
若想起我愛你的心肝
nā siūnn-khí guá ài lí ê sim-kuann
無論海水袂焦
bô-lūn hái-tsuí bē ta
石頭袂爛
tsio̍h-thâu bē nuā
你共看
lí kā khuànn
前闊後闊
tsîng khuah āu khuah
火炭斜斜
hué-thuànn tshua̍h-tshua̍h
虱目魚會跳過岸
sat-ba̍k-hî ē thiàu kuè huānn
奇奇巧巧
kî-kî-khá-khá
攏是為著
lóng-sī uī-tio̍h
無緣的你啦
bô-iân ê lí–lah
↑↑(口白)—(口白)—(口白)↑↑
女性咧變卦
lú-sìng teh piàn-kuà
愈想心愈驚
jú siūnn sim jú kiann
可比船過岸
khó-pí tsûn kuè huānn
僥倖無當看
hiau-hīng bô-tàng khuànn
↓↓(口白)—(口白)—(口白)↓↓
如今的我
jû-kim ê guá
三步做兩步行
sann-pōo tsuè nn̄g-pōo kiânn
孤單踮在大狗山的大狗嶺
koo-tuann tiàm-tsāi Tuā-káu-suann ê Tuā-káu-niá
有也看
ū iā khuànn
無也看
bô iā khuànn
看著雞母娶雞仔囝
khuànn-tio̍h ke-bú tshuā kue-á-kiánn
人阮嘛有想欲做好囝
lâng gún mā ū siūnn-beh tsuè hó-kiánn
啊!人生算來海海矣
ah! jîn-sing sǹg lâi hái-hái–ah
木師的釘柴屐
ba̍k-sai–ê tìng tshâ-kia̍h
塗水師的咧抹壁
thôo-tsuí-sai–ê tih buah-piah
馬馬虎虎啊
má-má-hu-hu–ah
閣講嘛無較縒
koh kóng mā bô-khah-tsua̍h
↑↑(口白)—(口白)—(口白)↑↑
花謝了看破
hue siā liáu khuànn-phuà
想也無較縒
siūnn iā bô-khah-tsua̍h
