賣田歌
《賣田歌》Bē-tshân Kua【南面而歌】
楊肅浩Iûnn Siok-hō
——————————————
火車若過石城
hué-tshia nā kuè Tsio̍h-siânn
海是啥人的
hái sī siáng ê
龜山島替咱寫一張批
Ku-suann-tó thè lán siá tsi̍t-tiunn phue
交予攑雨傘騎車的少年
kau hōo gia̍h hōo-suànn khiâ-tshia ê siàu-liân
覕過狹狹的田岸
bih kuè e̍h-e̍h ê tshân-huānn
到厝內底
kàu tshù-lāi-té
東北風輕輕吹
tang-pak-hong khin-khin tshue
雨來得細
hōo lâi tit sè
臺九線彎彎像一張批
Tâi-káu-suànn uan-uan tshiūnn tsi̍t-tiunn phue
序大巡田水
sī-tuā sûn tshân-tsuí
巡甲頭鬃白
sûn kah thâu-tsang pe̍h
定定想少年時
tiānn-tiānn siūnn siàu-liân-sî
煩惱囡仔愛註冊
huân-ló gín-á ài tsù-tsheh
囡仔一个一个出社會
gín-á tsi̍t-ê tsi̍t-ê tshut-siā-huē
靴管穿咧煞驚歹勢
hia-kóng tshīng–leh suah kiann pháinn-sè
分袂清外地來的
hun buē tshing guā-tē lâi ê
抑是厝邊頭尾
ia̍h-sī tshù-pinn-thâu-bué
看板寫著有幾坪
kha̋ng-páng siá tio̍h ū kuí pênn
欲賣偌濟
beh bē guā-tsē
田園恬恬毋講話
tshân-huînn tiām-tiām m̄ kóng-uē
咱是予伊飼大的序細
lán sī hōo i tshī tuā ê sī-sè
稻米豐收頭犁犁
tiū-bí hong-siu thâu lê-lê
換來頓著印仔的厝契
uānn lâi tǹg-tio̍h ìn-á ê tshù-khè
田園目屎流偌濟
tshân-huînn ba̍k-sái lâu guā-tsē
晟養過偌濟人家
tshiânn-ióng kuè guā-tsē lâng-ke
等無春天的新穎發芽
tán bô tshun-thinn ê sin-ínn huat-gê
紅紅的印色
âng-âng ê ìn-sik
是伊心肝流的血
sī i sim-kuann lâu ê hueh
真濟農地變更做建地
tsin tsē lông-tē piàn-king tsuè kiàn-tē
紲落去農舍起了
suà–lueh lông-sià khí liáu
煞無人買
suah bô-lâng bé
分袂清
hun buē tshing
是伊的
sī i ê
是啥人的
sī siáng ê
煞夢著
suah bāng-tio̍h
彼條變色的蘭陽溪
hit tiâu piàn-sik ê Lân-iông-khe
田園恬恬毋講話
tshân-huînn tiām-tiām m̄ kóng-uē
咱是予伊飼大的序細
lán sī hōo i tshī tuā ê sī-sè
稻米豐收頭犁犁
tiū-bí hong-siu thâu lê-lê
換來頓著印仔的厝契
uānn lâi tǹg-tio̍h ìn-á ê tshù-khè
田園目屎流偌濟
tshân-huînn ba̍k-sái lâu guā-tsē
晟養過偌濟人家
tshiânn-ióng kuè guā-tsē lâng-ke
等無春天的新穎發芽
tán bô tshun-thinn ê sin-ínn huat-gê
紅紅的印色
âng-âng ê ìn-sik
是伊心肝流的血
sī i sim-kuann lâu ê hueh
東北風
tang-pak-hong
溫柔吹過
un-jiû tshue–kuè
聽著淺淺的田水
thiann-tio̍h tshián-tshián ê tshân-tsuí
咧講一句話
teh kóng tsi̍t-kù uē
講留袂牢家伙
kóng lâu buē tiâu ke-hué
真正狼狽
tsin-tsiànn liông-puē
將伊拍拚的身軀
tsiong i phah-piànn ê sin-khu
提去賣
the̍h-khì bē
