六月茉莉
《六月茉莉》La̍k-gue̍h Ba̍k-nī
楊美麗 Iûnn Bí-lē
——————————————
火車隨著人生的路咧行
hué-tshia suî tio̍h jîn-sing ê lōo teh kiânn
有一站你仝車廂坐阮隔壁
ū tsi̍t tsām lí kāng tshia-siunn tsē gún keh-piah
彼陣陪我欣賞窗外的過影
hit-tsūn puê guá him-sióng thang-guā ê kuè iánn
交換咱青春的美夢
kau-uānn lán tshing-tshun ê bí-bāng
失戀有時親像舊電影閣搬
sit-luân ū-sî tshin-tshiūnn kū tiān-iánn koh puann
上艱苦是你落車的彼一暗
siōng kan-khóo sī lí lo̍h-tshia ê hit tsi̍t-àm
我身邊坐滿
guá sin-pinn tsē muá
是寂寞的孤單佮烏暗
sī tsi̍k-bo̍k ê koo-tuann kah oo-àm
伴著阮幾若冬
phuānn tio̍h gún kuí-lō tang
六月茉莉的情歌
la̍k-gue̍h ba̍k-nī ê tsîng-kua
猶佇夢中
iáu tī bāng-tiong
聲聲喝你的名
siann-siann huah lí ê miâ
阮有這馬的生活
gún ū tsit-má ê sing-ua̍h
嘛有愛我的人
mā ū ài guá ê lâng
但是你閣覕咧心肝
tān-sī lí koh bih teh sim-kuann
六月茉莉的思念
la̍k-gue̍h ba̍k-nī ê su-liām
親像花芳
tshin-tshiūnn hue-phang
飛風中
pue hong-tiong
無地寄
bô-tè kià
你這馬咧想啥人
lí tsit-má teh siūnn siánn-lâng
彼一个若猶原是阮
hit tsi̍t-ê nā iu-guân sī gún
你敢閣會出聲
lí kám koh ē tshut-siann
