毋免歹勢
《毋免歹勢》M̄-bián Pháinn-sè
黃妃N̂g Hui
——————————————
窗外的男男女女
thang-guā ê lâm-lâm-lú-lú
打扮遮美麗
tánn-pān tsiah bí-lē
手牽手散步
tshiú khan-tshiú sàn-pōo
咬耳約會
kā-hīnn iok-huē
世間的愛情
sè-kan ê ài-tsîng
無論你愛誰無關係
bô-lūn lí ài siáng bô-kuan-hē
無需要人來交陪
bô su-iàu lâng lâi kau-puê
每一款感情
muí tsi̍t-khuán kám-tsîng
難免多情來反背
lân-bián to-tsîng lâi huán-puē
相信真心一切攏好勢
siong-sìn tsin-sim it-tshè lóng hó-sè
淡薄看緣份
tām-po̍h khuànn iân-hūn
輕鬆若鳥仔自由飛
khin-sang ná tsiáu-á tsū-iû pue
向望囥咧心肝底
ǹg-bāng khǹg teh sim-kuann-té
毋免歹勢
m̄-bián pháinn-sè
早就慣勢無人講話
tsá tiō kuàn-sì bô-lâng kóng-uē
毋免安慰
m̄-bián an-uì
身邊無人會當體會
sin-pinn bô-lâng ē-tàng thé-huē
暗時會眠夢
àm-sî ē bîn-bāng
孤單像斷線風吹
koo-tuann tshiūnn tn̄g-suànn hong-tshue
深深的鼓井
tshim-tshim ê kóo-tsénn
看無天地
khuànn-bô thinn-tē
毋免歹勢
m̄-bián pháinn-sè
緣份註定由天控制
iân-hūn tsù-tiānn iû thinn khòng-tsè
毋免解說
m̄-bián kái-sueh
恬恬等待人來相揣
tiām-tiām tán-thāi lâng lâi sio-tshuē
期待一場夢
kî-thāi tsi̍t-tiûnn bāng
日夜嘛有人蓋被
ji̍t-iā mā ū-lâng kah-phuē
目睭瞌瞌
ba̍k-tsiu kheh-kheh
日子來時也無怨慼
ji̍t-tsí lâi sî iā bô uàn-tsheh
阮親像倔強干樂
gún tshin-tshiūnn ku̍t-kiông kan-lo̍k
寂寞戇戇踅
tsi̍k-bo̍k gōng-gōng se̍h
也毋敢家己澈底坦白
iā m̄-kánn ka-kī thiat-té thán-pe̍h
到人生這个坎站
kàu jîn-sing tsit ê khám-tsām
我得著有偌濟
guá tit-tio̍h ū guā tsuē
也欣羨有人相陪
iā him-siān ū-lâng siong-puê
—
毋免歹勢
m̄-bián pháinn-sè
免歹勢
bián pháinn-sè
緣份註定由天控制
iân-hūn tsù-tiànn iû thinn khòng-tsè
毋免解說
m̄-bián kái-sueh
恬恬等待人來相揣
tiām-tiām tán-thāi lâng lâi sio-tshuē
期待一場夢
kî-thāi tsi̍t-tiûnn bāng
日夜嘛有人蓋被
ji̍t-iā mā ū-lâng kah-phuē
目睭瞌瞌
ba̍k-tsiu kheh-kheh
日子來時也無怨慼
ji̍t-tsí lâi sî iā bô uàn-tsheh
目睭瞌瞌
ba̍k-tsiu kheh-kheh
日子來時也無怨慼
ji̍t-tsí lâi sî iā bô uàn-tsheh
