賣菜義仔
《賣菜義仔》Bē-tshài Gī–á
黃西田 N̂g Se-tiân
——————————————
賣菜義啊囉
Buē-tshài-gī–ah-loh
透早出門做生理
thàu-tsá tshut-mn̂g tsuè sing-lí
毋管霜風冷吱吱
m̄-kuán sng-hong líng-ki-ki
擔著青菜
tann tio̍h tshinn-tshài
向菜市仔一直去
hiòng tshài-tshī-á it-ti̍t khì
為著欲趕早市
uī-tio̍h beh kuánn tsá-tshī
毋通踮遮閣延遲
m̄-thang tiàm tsia koh iân-tî
緊來走啊
kín lâi tsáu–ah
緊來去
kín lâi-khì
目一下?
ba̍k tsi̍t-ē nih
閣看一下去
koh khuànn tsi̍t-ē khì
已經行到菜市仔邊
í-king kiânn kàu tshài-tshī-á pinn
嘿!彼就真佳哉
heh! he tō tsin ka-tsài
啊隔壁攏猶未人來擺
ah keh-piah lóng iáu-bē lâng lâi pái
我著緊來開市嘛
guá tio̍h kín lâi khui-tshī–mah
才應該噫~
tsiah ìng-kai–ih~
喔!遠遠看著小姐
ooh! hn̄g-hn̄g khuànn-tio̍h sió-tsiá
捾菜籃咧對遮來喔
kuānn tshài-nâ–leh tuì tsia lâi–ooh
你是今仔日第一个人客
lí sī kin-á-ji̍t tē-it ê lâng-kheh
應該著犧牲大減價
ìng-kai to̍h hi-sing tuā kiám-kè
我的菜蔬是真濟
guá ê tshài-se sī tsin tsuē
應有盡有無問題
ìng-ū tsīn-ū bô būn-tuê
你欲芹菜高麗菜
lí beh khîn-tshài ko-lê-tshài
菠薐菜
pue-lîng-tshài
萵仔菜
ue-á-tshài
苳蒿菜
tang-o-tshài
捲心白菜
kńg-sim-pe̍h-tshài
韭菜
kú-tshài
花仔菜
hue-á-tshài
嘛有彼號
mā ū hit-lō
食著會補血的紅光菜
tsia̍h tio̍h ē póo-hueh ê âng-kong-tshài
人講冬瓜清涼會開脾
lâng kóng tang-kue tshing-liâng ē khui-pî
金瓜好食會助胃
kim-kue hó-tsia̍h ē tsōo-uī
苦瓜先苦而後甜
khóo-kue sing khóo jî hiō tinn
菜瓜仔食著會紲喙
tshài-kue-á tsia̍h tio̍h ē suà-tshuì
小姐愛食是芫荽
sió-tsiá ài tsia̍h sī iân-sui
這是初戀的氣味
tse sī tshoo-luân ê khì-bī
包你愛情會順序
pau lí ài-tsîng ē sūn-sī
講到下頦強欲落落去
kóng kah ē-huâi kiōng-bueh làu–lo̍h-khì
小姐一時心花開
sió-tsiá tsi̍t-sî sim-hue khui
啊雄雄才開喙
ah hiông-hiông tsiah khui-tshuì
問我蔥頭一斤偌濟錢
mn̄g guá tshang-thâu tsi̍t-kin guā-tsē tsînn
賰的伊攏無愛挃
tshun–ê i lóng bô-ài ti̍h
予我聽著
hōo guá thiann tio̍h
強欲昏落去
kiōng-beh hūn–lo̍h-khì
講甲天花佮亂墜
kóng kah thian-hua kah luān-tuī
只有趁你一箍兩角錢
tsí-ū thàn lí tsi̍t-khoo nn̄g-kak tsînn
想著真哭氣
siūnn-tio̍h tsin khàu-khì
啊~為著三頓不得已
ah~ uī-tio̍h sann-tǹg put-tik-í
較苦嘛著忍耐度時機
khah khóo mā tio̍h jím-nāi tōo sî-ki
