思念故鄉的情人
《思念故鄉的情人》Su-liām Kòo-hiong ê Tsîng-jîn
黃三元N̂g Sam-guân
——————————————
看見著彼爿山嶺
khuànn-kìnn tio̍h hit-pîng suann-niá
故鄉鳥隻飛過來
kòo-hiong tsiáu-tsiah pe kè–lâi
若親像彼个姑娘
ná-tshin-tshiūnn hit ê koo-niû
叫我較緊倒轉去
kiò guá khah-kín tò-tńg–khì
忍袂住熱情珠淚
jím bē-tsū jia̍t-tsîng tsu-luī
滴落異鄉的河邊
tih lo̍h ī-hiong ê hô-pinn
初戀的綿綿情意
tshoo-luân ê mî-mî tsîng-ì
引我來思念彼時
ín guá lâi su-liām hit-sî
故鄉心愛彼个人
kòo-hiong sim-ài hit ê lâng
看見著遙遠彼爿
khuànn-kìnn tio̍h iâu-uán hit-pîng
情侶坐在草埔邊
tsîng-lī tsē tsāi tsháu-poo pinn
怎樣我孤單一个
tsuánn-iūnn guá koo-tuann tsi̍t-ê
踮在他鄉心稀微
tiàm-tsāi thann-hiong sim hi-bî
忍袂住滿腹憂悶
jím bē-tsū muá-pak iu-būn
孤鳥伴我無聊時
koo-tsiáu phuānn guá bô-liâu-sî
一時來茫茫想起
tsi̍t-sî lâi bâng-bâng siūnn-khí
等何時才會相會
tán hô-sî tsiah ē siong-huē
故鄉心愛彼个人
kòo-hiong sim-ài hit ê lâng
看見著青翠山崙
khuànn-kìnn tio̍h tshinn-tshuì suann-lūn
白雲飄來又飄去
pe̍h-hûn phiau lâi iū phiau khì
若親像我的身軀
ná-tshin-tshiūnn guá ê sin-khu
一直流浪他鄉里
it-ti̍t liû-lōng thann-hiong-lí
想彼時為著前途
siūnn hit-sî uī-tio̍h tsiân-tôo
跳出可愛的故鄉
thiàu tshut khó-ài ê kòo-hiong
希望你快樂心情
hi-bāng lí khuài-lo̍k sim-tsîng
期待著相會日子
kî-thāi tio̍h siong-huē ji̍t-tsí
故鄉心愛彼个人
kòo-hiong sim-ài hit ê lâng
