一把鹽
《一把鹽》Tsi̍t-pé Iâm
傅振輝Pòo Tsín-hui
——————————————
安全講你真危險
an-tsuân kóng lí tsin guî-hiám
幸福講你四界佔
hīng-hok kóng lí sì-kè tsiàm
怹攏苦勸我著緊閃
in lóng khóo-khǹg guá tio̍h kín siám
花心講你攏袂忝
hue-sim kóng lí lóng buē thiám
信用講你無清廉
sìn-iōng kóng lí bô tshing-liâm
著趕緊閃
tio̍h kuánn-kín siám
才袂失去尊嚴
tsiah buē sit-khì tsun-giâm
你的反背
lí ê huán-puē
像一枝無情劍
tshiūnn tsi̍t-ki bô-tsîng kiàm
一旦出鞘
it-tàn tshut-siaù
傷害比火閣較炎
siong-hāi pí hué koh-khah iām
我的思念
guá ê su-liām
就親像一把鹽
tiō tshin-tshiūnn tsi̍t-pé iâm
坱落目睭
ing lo̍h ba̍k-tsiu
心疼比海閣較鹹
sim thiànn pí hái koh-khah kiâm
敢講這攏是
kám-kóng tse lóng-sī
因為頂世人虧欠
in-uī tíng-sì-lâng khui-khiàm
