戀戀北迴線
《戀戀北迴線》Luân-Luân Pak-huê Suànn
作詞作曲：黃麒嘉N̂g Kî-ka
————————————-
火車載阮欲來去 台灣的後花園
hué-tshia tsài gún beh lâi-khì, Tâi-uân ê āu-hue-hn̂g
世間上媠的所在 攏佇彼一爿
sè-kan siōng suí ê sóo-tsāi, lóng tī hit tsi̍t pîng
瑞芳金瓜石 溫柔可愛的基隆河
Suī-hong Kim-kue-tsio̍h, un-jiû khó-ài ê Ke-lâng-hô
朦朧三貂嶺 青青雙溪水
bong-lông Sam-tiau-niá, tshinn-tshinn Siang-khe tsuí
釉釉閣綿綿 親像一首詩
iu-iu koh mî-mî, tshin-tshiūnn tsi̍t siú si
行到福隆 看見著海邊
kiânn kàu Hok-liông, khuànn-kìnn tio̍h hái-pinn
玲玲瑯瑯 搖過基隆河
lin-lin-long-long, iô kuè Ke-lâng-hô
敧敧硞硞 盤過三貂嶺
khi-khi- kho̍k kho̍k, puânn kuè Sam-tiau-niá
船隻漂來又漂去 海風帶鹹味
tsûn-tsiah phiau lâi iū phiau khì, hái-hong tuà kiâm-bī
海面金金咧閃爍 日頭浮上天
hái-bīn kim-kim teh siám-sih, ji̍t-thâu phû tsiūnn thinn
北關的海湧 規工歡喜咧唱歌
Pak-kuan ê hái-íng, kui-kang huann-hí teh tshiùnn-kua
熱情龜山島 陪咱鬥陣行
jia̍t-tsîng Ku-suann-tó, puê lán tàu-tīn kiânn
礁溪洗溫泉 宜蘭買膽肝
Ta-khe sé un-tsuânn, Gî-lân bé tánn-kuann
來到蘇澳 海產上好食
lâi-kàu Soo-ò, hái-sán siōng hó-tsia̍h
窸窸沙沙 海湧咧唱歌
si-si-sa-sa, hái-íng teh tshiùnn-kua
嚕嚕啦啦 礁溪洗溫泉
lu-lu-la-lah, Ta-khe sé un-tsuânn
大山大海大港灣 花蓮到台東
tuā suann tuā hái tuā káng-uan, Hua-lian kàu Tâi-tang
大橋大溪大磅空 磅空烏籠籠
tuā kiô tuā khe tuā pōng-khang, pōng-khang oo-lang-lang
遊賞太魯閣 散步迷人的鯉魚潭
iû-siúnn Thāi-lú-kok, sàn-pōo bê-lâng ê Lí-hî-thâm
坐船秀姑巒 台東挽金針
tsē tsûn Siù-koo-luân, Tâi-tang bán kim-tsiam
世外的桃源 美麗的台灣
sè-guā ê thô-guân, bí-lē ê Tâi-uân
自由自在 幸福台灣人
tsū-iû-tsū-tsāi, hīng-hok Tâi-uân-lâng
听听啌啌 火車軁磅空
khin-khin-khong-khong, hué-tshia nǹg pōng-khang
吧哪吧吧 火車咧相閃
pann-na-pann-pann, hué-tshia teh sio-siám
