咱的青春
《咱的青春》Lán ê Tshing-tshun
黃靜雅N̂g Tsīng-ngá
——————————————
彼工無日無雨
hit kang bô ji̍t bô hōo
彼工有風有雲
hit kang ū hong ū hûn
相招做陣散步解悶
sio-tsio tsuè-tīn sàn-pōo kái-būn
行來去海邊看黃昏
kiânn lâi-khì hái-pinn khuànn hông-hun
海邊有海湧有船
hái-pinn ū hái-íng ū tsûn
海湧一陣一陣
hái-íng tsi̍t-tsūn-tsi̍t-tsūn
想起當初
siūnn-khí tong-tshoo
咱熟似的緣份
lán si̍k-sāi ê iân-hūn
咱的青春
lán ê tshing-tshun
往事如雲
óng-sū jû hûn
想欲佮你坐一隻船
siūnn-beh kah lí tsē tsi̍t-tsiah tsûn
渡過時間的大海
tōo-kuè sî-kan ê tuā-hái
轉去彼當陣
tńg-khì hit-tang-tsūn
想欲走揣咱的單純
siūnn-beh tsáu-tshuē lán ê tan-sûn
沉落時間的大海
tîm lo̍h sî-kan ê tuā-hái
揣無咱的青春
tshuē-bô lán ê tshing-tshun
—
風吹著咱的衫裙
hong tshue tio̍h lán ê sann-kûn
風吹著天邊的雲
hong tshue tio̍h thinn-pinn ê hûn
吹過咱的青春
tshue kuè lán ê tshing-tshun
吹過咱的青春
tshue kuè lán ê tshing-tshun
