羅漢跤仔
《羅漢跤仔》Lô-hàn-kha-á
陳雷 Tân-luî
——————————————
歲頭食甲欲三十外
huè-thâu tsia̍h kah beh sann-tsa̍p guā
無某無猴羅漢跤
bô-bóo-bô-kâu lô-hàn-kha
暗時仔欲睏揣無伴
àm-sî-á beh khùn tshuē-bô phuānn
頂被下被會畏寒
tíng phuē ē phuē ē uì-kuânn
阮哪會無某通好娶
gún ná ē bô bóo thang-hó tshuā
想著怨嘆捶心肝
siūnn-tio̍h uàn-thàn tuî-sim-kuann
姻緣錯過幾若攤
in-iân tshò-kuè kuí-lō thuann
朋友啊
pîng-iú–ah
阮來對頭仔講予恁聽
gún lâi tuì thâu-á kóng hōo-lín thiann
上早熟似彼个李小姐
siōng-tsá si̍k-sāi hit-ê Lí-sió-tsiá
兩人戀愛欲三年外
nn̄g-lâng luân-ài beh sann-nî guā
嫌阮無厝也無車
hiâm gún bô tshù iā bô tshia
嫁予別人做娘囝
kè hōo pa̍t-lâng tsuè niû-kiánn
後來熟似張小姐
āu–lâi si̍k-sāi Tiunn-sió-tsiá
伊佮社會咧時行
i kah siā-huē teh sî-kiânn
單身貴族較快活
tan-sin kuì-tso̍k khah khuìnn-ua̍h
無愛嫁翁受拖磨
bô-ài kè-ang siū thua-buâ
最近相親彼个許小姐
tsuè-kīn siòng-tshin hit-ê Khóo-sió-tsiá
怹厝的人規大拖
in tshù ê lâng kui tuā-thua
牽來牽去是親情
khan lâi khan khì sī tshin-tsiânn
怹老爸是阮表兄
in lāu-pē sī gún piáu-hiann
寶貴青春去一半
pó-kuì tshing-tshun khì tsi̍t-puànn
婚頭袂浮欲按怎
hun-thâu buē phû beh án-tsuánn
雖然每日咧嘆孤單
sui-jiân muí-ji̍t leh thàn koo-tuann
期待姻緣無嫌晏
kî-thāi in-iân bô hiâm uànn
毋信阮是獨身仔命
m̄-sìn gún sī to̍k-sin-á miā
各位朋友佮弟兄
kok-uī pîng-iú kah tī-hiann
恁厝若有查某囝
lín tshù nā ū tsa-bóo-kiánn
都毋通袂記咧
to m̄-thang buē-kì–leh
才來佮阮結親情
tsiah lâi kah gún kiat tshin-tsiânn
