頭毛喙鬚白
《頭毛喙鬚白》Thâu-mn̂g Tshuì-tshiu Pe̍h
陳雷Tân Luî
——————————————
心情有淡薄悶啊
sim-tsîng ū tām-po̍h būn–ah
規暝也無睏
kui-mî iā bô khùn
想欲來點一枝薰啊
siūnn-beh lâi tiám tsi̍t-ki hun–ah
半枝也無賰
puànn-ki iā bô tshun
一去遐爾遠呢
tsi̍t-khì hiah-nī hn̄g–neh
無批來相借問
bô phue lâi sio-tsioh-mn̄g
毋知已經等偌久
m̄-tsai í-king tán guā kú
日子嘛袂曉算
ji̍t-tsí mā buē-hiáu sǹg
離開彼領冷冷的被
lī-khui hit niá líng-líng ê phuē
恬恬佇窗邊坐
tiām-tiām tī thang-pinn tsē
看見著天邊的月
khuànn-kìnn tio̍h thinn-pinn ê ge̍h
嘛去予烏雲閘著咧
mā khì hōo oo-hûn tsa̍h–tio̍h leh
月娘啊免怨慼
gue̍h-niû–ah bián uàn-tsheh
烏雲會連鞭過
oo-hûn ē liâm-mi kuè
可憐啊可憐的我
khó-liân–ah khó-liân ê guá
敢會等甲
kám ē tán kah
頭毛喙鬚白
thâu-mn̂g tshuì-tshiu pe̍h
