染色的頭鬃
《染色的頭鬃》Ní-sik ê Thâu-tsang
陳雷Tân Luî
——————————————
愛的無尾巷
ài ê bô-bué-hāng
等規晡等無人
tán kui-poo tán bô-lâng
徛佇樓跤等候
khiā tī lâu-kha tán-hāu
望你拍開玻璃窗
bāng lí phah-khui po-lê-thang
純情歌阮有攢
sûn-tsîng kua gún ū tshuân
聲聲句句
siann-siann-kù-kù
唱出願望
tshiùnn-tshut guān-bāng
誰知影開窗
siáng tsai-iánn khui thang
毋是一个人
m̄-sī tsi̍t-ê lâng
疼若無價值
thiànn nā bô kè-ta̍t
哪通閣繼續望
ná thang koh kè-sio̍k bāng
戀夢夢到盈暗
luân-bāng bāng kàu îng-àm
十三個月過兩工
tsa̍p-sann-kò gue̍h kuè nn̄g-kang
毋是阮等無人
m̄-sī gún tán bô-lâng
是你身份已經無仝
sī lí sin-hūn í-king bô-kāng
緣份花謝落塗
iân-hūn hue siā lo̍h-thôo
就親像
tiō tshin-tshiūnn
你染過色的頭鬃
lí ní kuè sik ê thâu-tsang
一部剪剪剪袂斷的留戀
tsi̍t-phō tsián, tsián, tsián buē tn̄g ê liû-luân
一段心疼烏?紅
tsi̍t-tuānn sim thiànn oo-tòo-âng
情愛若凝血
tsîng-ài nā gîng-hueh
阮嘛毋敢控
gún mā m̄-kánn khàng
偏偏花開
phian-phian hue khui
花燦爛花離欉
hue tshàn-lān hue lî tsâng
夜夜心疼用手捀
iā-iā sim thiànn iōng tshiú phâng
變色的戀夢
piàn-sik ê luân-bāng
染色的頭鬃
ní-sik ê thâu-tsang
