想你的時陣
《想你的時陣》Siūnn Lí ê Sî-tsūn
陳雷Tân Luî
——————————————-
天未光
thinn buē kng
踏出這扇門
ta̍h-tshut tsit sìnn mn̂g
離別就袂倒轉
lī-pia̍t tiō buē tò-tńg
路燈照袂著
lōo-ting tsiò buē tio̍h
感情欲怎拍算
kám-tsîng beh tsuánn phah-sǹg
是露水般的緣份
sī lōo-tsuí puann ê iân-hūn
你予我想著心酸酸
lí hōo guá siūnn-tio̍h sim-sng-sng
幸福佇千里遠
hīng-hok tī tshian-lí hn̄g
青春是漸漸漸漸
tshing-tshun sī tsiām-tsiām, tsiām-tsiām
為情拍損
uī tsîng phah-sńg
我只好無聲
guá tsí-hó bô-siann
陪伴你
puê-phuānn lí
等天光
tán thinn-kng
想著你你你的時陣
siūnn-tio̍h lí, lí, lí ê sî-tsūn
彼款的痛苦
hit khuán ê thòng-khóo
欲怎吞忍
beh tsuánn thun-lún
拍開一扇窗
phah-khui tsi̍t-sìnn thang
鎖著一扇門
só-tio̍h tsi̍t-sìnn mn̂g
往事踮心中保存
óng-sū tiàm sim-tiong pó-tsûn
想著你你你的時陣
siūnn-tio̍h lí, lí, lí ê sî-tsūn
一張批寫著兩字心酸
tsi̍t-tiunn phue siá-tio̍h nn̄g-jī sim-sng
窗外月光光
thang-guā gue̍h kng-kng
照著阮眠床
tsiò-tio̍h gún bîn-tshn̂g
一暝思念陪伴阮
tsi̍t-mî su-liām puê-phuānn gún
