心肝掠坦橫
《心肝掠坦橫》Sim-kuann Lia̍h-thán-huâinn
陳雷Tân Luî
——————————————
今夜的月光照啊
kim-iā ê ge̍h-kng tsiò–ah
照佇咧房間仔內
tsiò tī-leh pâng-king-á lāi
攑頭若對著月眉
gia̍h-thâu nā tuì tio̍h ge̍h-bâi
幌頭仔一直栽
hàinn-thâu-á it-ti̍t tsai
愛人變心矣
ài-jîn piàn-sim–ah
放一張紅帖仔來
pàng tsi̍t-tiunn âng-thiap-á lâi
講伊決定後禮拜
kóng i kuat-tīng āu-lé-pài
欲嫁予別人做太太
beh kè hōo pa̍t-lâng tsuè thài-thài
啊這是啥物世界
ah tse sī siánn-mih sè-kài
對良心敢會交代
tuì liông-sim kám ē kau-tài
想著火氣規腹內
siūnn tio̍h hué-khì kui pak-lāi
心肝掠坦橫喔
sim-kuann lia̍h-thán-huâinn–ooh
祝恁幸福好將來
tsiok lín hīng-hok hó tsiong-lâi
下暗的風颱吹啊
ē-àm ê hong-thai tshue–ah
吹入去房間仔內
tshue ji̍p-khì pâng-king-á lāi
開窗若對著風雨
khui thang nā tuì tio̍h hong-hōo
哭調仔一直哀
khàu-tiāu-á it-ti̍t ai
朋友好心啊
pîng-iú hó-sim–ah
敲一通電話來
khà tsi̍t-thong tiān-uē lâi
才知阮彼个死忠換帖的
tsiah tsai gún hit-ê sí-tiong uānn-thiap–ê
原來做囝婿
guân-lâi tsuè kiánn-sài
啊這是啥物世界
ah tse sī siánn-mih sè-kài
對社會敢會交代
tuì siā-huē kám ē kau-tài
想著目屎吞腹內
siūnn tio̍h ba̍k-sái thun pak-lāi
心肝掠坦橫喔
sim-kuann lia̍h-thán-huâinn–ooh
來去出家食菜
lâi-khì tshut-ke tsia̍h-tshài
