老伴
《老伴》Lāu-phuānn
陳思安Tân Su-an
——————————————
↓↓(口白)—(口白)—(口白)↓↓
無人知影
bô-lâng tsai-iánn
老阿媽
lāu-a-má
哪會攏佇落雨的暗暝
ná ē lóng tī lo̍h-hōo ê àm-mî
一个人看著雨水
tsi̍t-ê-lâng khuànn tio̍h hōo-tsuí
一滴一滴
tsi̍t-tih-tsi̍t-tih
對厝瓦滴落塗跤
tuì tshù-hiā tih lo̍h thôo-kha
看甲目睭微微
khuànn kah ba̍k-tsiu bui-bui
目屎若親像雨水
ba̍k-sái ná-tshin-tshiūnn hōo-tsuí
我真想欲問老阿媽
guá tsin siūnn-beh mn̄g lāu-a-má
你到底是咧想啥
lí tàu-té sī leh siūnn siánn
你的心內
lí ê sim-lāi
到底有啥物祕密啊
tàu-té ū siánn-mih pì-ba̍t–ah
老阿媽越頭
lāu-a-má ua̍t-thâu
驚仔予人看著
kiann-á hōo-lâng khuànn-tio̍h
伊目尾的悲愁
i ba̍k-bué ê pi-tshiû
伊講
i kóng
無啦
bô–lah
啊這雨乎
ah tse hōo–honnh
哪會攏落袂煞啊
ná ē lóng lo̍h buē suah–ah
有一工
ū-tsi̍t-kang
雨水仝款是落規暗
hōo-tsuí kāng-khuán sī lo̍h kui-àm
我看著老阿媽
guá khuànn-tio̍h lāu-a-má
又閣坐踮門跤口
iū-koh tsē tiàm mn̂g-kha-kháu
佇咧看雨
tī-leh khuànn hōo
我輕輕共叫
guá khin-khin kā kiò
老阿媽頭頕頕
lāu-a-má thâu tàm-tàm
無應聲
bô ìn-siann
伊的手裡
i ê tshiú–lìn
挈著一張足舊的相片
khe̍h-tio̍h tsi̍t-tiunn tsok kū ê siòng-phìnn
相片的彼个人
siòng-phìnn ê hit ê lâng
就是老阿媽過去的老伴
tiō-sī lāu-a-má kuè-khì ê lāu-phuānn
老阿媽看著一暝的雨水
lāu-a-má khuànn tio̍h tsi̍t-mî ê hōo-tsuí
目睭瞌瞌
ba̍k-tsiu kheh-kheh
帶著笑容
tuà tio̍h tshiò-iông
佇天猶未光的透早
tī thinn iáu-bē kng ê thàu-tsá
佮伊的老伴做陣走矣
kah i ê lāu-phuānn tsuè-tīn tsáu–ah
我徛踮老阿媽的房間門口
guá khiā tiàm lāu-a-má ê pâng-king mn̂g-kháu
眠床頂彼領退色的鴛鴦被
mn̂g-tshn̂g-tíng hit niá thè-sik ê uan-iunn-phuē
閣摺甲真整齊
koh tsih kah tsin tsíng-tsê
半遮的蠓罩
puànn-jia ê báng-tà
替老阿媽掩崁著
thè lāu-a-má am-khàm tio̍h
足濟的思念佮悲哀
tsiok tsē ê su-liām kah pi-ai
原來老阿媽的目屎
guân-lâi lāu-a-má ê ba̍k-sái
是佇咧祈求伊的老伴
sī tī-leh kî-kiû i ê lāu-phuānn
著愛會記得來共我?
tio̍h-ài ē-kì-lit lâi kā guá tshuā
雨水一滴一滴
hōo-tsuí tsi̍t-tih-tsi̍t-tih
滴佇塗跤
tih tī thôo-kha
老阿媽講
lāu-a-má kóng
這是怹老的的跤步聲
tse sī in lāu–ê ê kha-pōo-siann
我今仔日才知影
guá kin-á-ji̍t tsiah tsai-iánn
老阿媽心內咧想啥
lāu-a-má sim-lāi teh siūnn siánn
↑↑(口白)—(口白)—(口白)↑↑
一領被
tsi̍t-niá phuē
同齊蓋
tâng-tsê kah
攬著你
lám tio̍h lí
毋驚風寒
m̄-kiann hong-kuânn
聽著你的跤步聲
thiann-tio̍h lí ê kha-pōo-siann
輕輕叫一聲
khin-khin kiò tsi̍t-siann
老伴
lāu-phuānn
半暝仔的雨聲
puànn-mî-á ê hōo-siann
予阮閣想起著較早
hōo gún koh siūnn-khí tio̍h khah-tsá
一句話就將阮來定
tsi̍t-kù uē tiō tsiong gún lâi tiānn
做你牽手綴你行
tsuè lí khan-tshiú tuè lí kiânn
風風雨雨的青春啊
hong-hong-ú-ú ê tshing-tshun–ah
起起落落也無算啥
khí-khí-lo̍h-lo̍h iā bô sǹg siánn
將恩恩怨怨攏留佇遮
tsiong un-un-uàn-uàn lóng lâu tī tsia
有你
ū lí
阮閣欲計較啥
gún koh beh kè-kàu siánn
一領被
tsi̍t-niá phuē
同齊蓋
tâng-tsê kah
攬著你
lám tio̍h lí
毋驚風寒
m̄-kiann hong-kuânn
聽著你的跤步聲
thiann-tio̍h lí ê kha-pōo-siann
輕輕叫一聲
khin-khin kiò tsi̍t-siann
老伴
lāu-phuānn
聽著你的跤步聲
thiann-tio̍h lí ê kha-pōo-siann
輕輕叫一聲
khin-khin kiò tsi̍t-siann
老的
lāu–ê
