情話
《情話》Tsîng-uē
陳怡婷Tân Î-tîng
——————————————
行在雨中
kiânn tsāi hōo-tiong
輕風對面吹
khin-hong tuì bīn tshue
想起你所講的情話
siūnn-khí lí sóo kóng ê tsîng-uē
一手雨傘
tsi̍t-tshiú hōo-suànn
一手玫瑰花
tsi̍t-tshiú muî-kuì-hue
你已經行入阮的心底
lí í-king kiânn-ji̍p gún ê sim-té
就是永遠愛阮彼句話
tiō-sī íng-uán ài gún hit kù uē
一時軟心
tsi̍t-sî nńg-sim
魂煞綴你飛
hûn suah tuè lí pue
輕易相信你袂來反背
khin-ī siong-sìn lí buē lâi huán-puē
就墜落你溫柔的陷阱
tiō tuī-lo̍h lí un-jiû ê hām-tsénn
原來你只是咧講情話
guân-lâi lí tsí-sī teh kóng-tsîng-uē
是愛情滋味
sī ài-tsîng tsu-bī
變痴情孤戀花
piàn tshi-tsîng koo-luân hue
只是你喙邊講的情話
tsí-sī lí tshuì-pinn kóng ê tsîng-uē
是千年之戀
sī tshian-nî tsi luân
是萬年愛情之火
sī bān-nî ài-tsîng tsi hué
所有的經過
sóo-ū ê king-kuè
越頭來看
ua̍t-thâu lâi khuànn
若親像是一个笑話
ná-tshin-tshiūnn sī tsi̍t-ê tshiò-uē
