純情天婦羅
《純情天婦羅》Sûn-tsîng The̋n-pú-lah
陳昇Tân Sing
————————————-
自從咱戀愛以後
tsū-tsiông lán luân-ài í-āu
伊看著我 就頭犁犁
i khuànn-tio̍h guá tō thâu-lê-lê
阮知影伊做人真性格
gún tsai-iánn i tsuè-lâng tsin sìng-keh
像烏狗歹飼有白跤蹄
tshiūnn oo-káu pháinn tshī ū pe̍h-kha-tê
.
若毋是春天的愛情的批
nā-m̄-sī tshun-thinn ê ài-tsîng ê phue
等甲咇咇掣攏毋肯回
tán kah phi̍h-phi̍h-tshuah lóng m̄-khíng huê
你看伊做人有影真笑詼
lí khuànn i tsuè-lâng ū-iánn tsin tshiò-khe
手機仔煞袂hiáng紡一下
tshiú-ki-á suah buē-hiáng pháng tsi̍t-ē
.
——(客語)
天頂有雲有月也有星，(你把?放哪位?)
tien dang iu iun iu ngied ia iu sen, (?)
三餐五味綾羅肨紗
sam-con ng-mi lin-lo pong-sa
毋過還欠?(這位?)
m-koo han kiam ngai (?)
——(客語)
.
你毋通共阮騙到遮
lí m̄-thang kā guán phiàn kàu tsia
講我是彼蕊苦戀花
kóng guá sī hit-luí khóo-luân-hue
思思念念你彼句話
su-su-liām-liām lí hit-kù uē
講山珍海味的
kóng san-tin-hái-bī–ê
猶不如我天婦羅
iáu put-jû guá the̋n-pú-lah
.
自從咱分開了後
tsū-tsiông lán hun-khui liáu-āu
日夜顛倒毋知想啥貨
ji̍t-iā tian-tò m̄-tsai siūnn siánn-huè
阮知影伊做人真脫箠
gún tsai-iánn i tsuè-lâng tsin thut-tshuê
但是阮所愛是這味的
tān-sī guán sóo ài sī tsit-bī–ê
.
若毋是網路彼个姼仔詼
nā-m̄-sī bāng-lōo hit-ê tshit-á-khue
伊哪會茫茫煞嫁別个
i ná ē bâng-bâng suah kè pa̍t-ê
你看伊目睭是藏咧褲底
lí khuànn i ba̍k-tsiu sī tshàng leh khòo-té
電腦煞袂hiáng搐一下
tiān-náu suah buē-hiáng tiuh tsi̍t-ē
.
烏狗性格我真歹勢
oo-káu sìng-keh guá tsin pháinn-sè
我毋知影你咧驚啥貨
guá m̄-tsai-iánn lí leh kiann siánn-huè
三頓五味綾羅膨紗
sann-tǹg gōo-bī lîng-lô phòng-se
較想也是你一个
khah siūnn iā-sī lí tsi̍t-ê
.
你毋通共阮騙遮濟
lí m̄-thang kā gún phiàn tsiah tsē
我哪是彼蕊苦戀花
guá ná sī hit-luí khóo-luân-hue
思思念念你彼句話
su-su-liām-liām lí hit-kù uē
講山珍海味的
kóng san-tin-hái-bī–ê
嘛不如我這个天婦羅
mā put-jû guá tsit-ê the̋n-pú-lah
.
若毋是風雨中的苦戀花
nā-m̄-sī hong-ú tiong ê khóo-luân-hue
我早就捶心肝天天醉
guá tsá tō tuî-sim-kuann thian-thian tsuì
難忘的愛人仔
lân-bōng ê ài-jîn-á
伊雄雄欲離開
i hiông-hiông beh lī-khui
敢袂當重來閣愛一下
kám buē-tàng tîng-lâi koh ài tsi̍t-ē
.
自從分開了以後
tsū-tsiông hun-khui liáu í-āu
日夜顛倒親像是痟的
ji̍t-iā tian-tò tshan-tshiūnn sī siáu–ê
想你想甲著囡仔災
siūnn lí siūnn kah tio̍h gín-á-tse
毋知你敢有想阮這味的
m̄-tsai lí kám ū siūnn guán tsit-bī–ê
想你閣再叫一聲
siūnn lí koh-tsài kiò tsi̍t-siann
叫我是你的純情的天婦羅
kiò guá sī lí ê sûn-tsîng ê the̋n-pú-lah
