無情的大海
《無情的大海》Bô-tsîng ê Tuā-hái【南面而歌】
陳東賢 Tân Tong-hiân
余國光 Î Kok-kong
——————————————
阿爸離開已經三年外
a-pah lī-khui í-king sann-nî guā
阿母逐工來到海邊金金仔看
a-bú ta̍k-kang lâi-kàu hái-pinn kim-kim-á khuànn
看伊掠魚的船隻
khuànn i lia̍h-hî ê tsûn-tsiah
總有一工
tsóng–ū tsi̍t-kang
出現佇海平線
tshut-hiān tī hái-pîng-suànn
遮是海邊的小庄頭
tsia sī hái-pinn ê sió tsng-thâu
六輕來了
La̍k-khin lâi liáu
神明嘛趕袂走
sîn-bîng mā kuánn buē tsáu
這是故鄉悲情的源頭
tse sī kòo-hiong pi-tsîng ê guân-thâu
天啊
thinn–ah
你哪會恬恬
lí ná ē tiām-tiām
看阮咧吼
khuànn gún teh háu
為著生活
uī-tio̍h sing-ua̍h
逐工出海去拍拚
ta̍k-kang tshut-hái khì phah-piànn
近海無魚
kīn-hái bô hî
逐魚賭性命
jio̍k hî tóo sìnn-miā
海湧無了解阿爸的心情
hái-íng bô liáu-kái a-pah ê sim-tsiânn
予伊跋落枉死城
hōo i pua̍h lo̍h óng-sí-siânn
大海
tuā-hái
你哪會遮無情
lí ná ē tsiah bô-tsîng
沖散一對鴛鴦的老感情
tshiong suànn tsi̍t-tuì uan-iunn ê lāu kám-tsîng
海風猶原遮鎮靜
hái-hong iu-guân tsiah tìn-tsīng
共毒素吹向村民的面頭前
kā to̍k-sòo tshue hiòng tshuan-bîn ê bīn-thâu-tsîng
大海
tuā-hái
你哪會遮無情
lí ná ē tsiah bô-tsîng
無帶念咱一世人的感情
bô tài-liām lán tsi̍t-sì-lâng ê kám-tsîng
海湧猶原是海湧
hái-íng iu-guân sī hái-íng
阿母的目屎流袂停
a-bú ê ba̍k-sái lâu buē thîng
