厝邊頭尾
《厝邊頭尾》Tshù-pinn Thâu-bué
陳一郎Tân It-lông
——————————————
以前農業的社會
í-tsîng lông-gia̍p ê siā-huē
厝邊隔壁真好禮
tshù-pinn keh-piah tsin hó-lé
路頭路尾若經過
lōo-thâu-lōo-bué nā king-kuè
遠遠就講入來坐
hn̄g-hn̄g tiō kóng ji̍p-lâi tsē
當今工商的社會
tong-kim kang-siong ê siā-huē
逐家無閒做工課
ta̍k-ke bô-îng tsuè khang-khuè
樓跤樓頂若經過
lâu-kha lâu-tíng nā king-kuè
相拄嘛是講無話
sio-tú mā sī kóng bô uē
厝邊頭尾
tshù-pinn-thâu-bué
親像仝一家
tshin-tshiūnn kāng tsi̍t-ke
互相著愛好做伙
hōo-siong tio̍h-ài hó tsò-hué
若有困難的問題
nā ū khùn-lân ê būn-tê
逐家著愛幫忙到底
ta̍k-ke tio̍h-ài pang-bâng kàu té
咱厝內若是無人佇咧
lán tshù-lāi nā-sī bô-lâng tī-leh
嘛才有人看頭看尾
mā tsiah ū-lâng khuànn-thâu-khuànn-bué
