黏黐黐
《黏黐黐》Liâm-thi-thi
郭婷筠Kueh Tîng-ûn
——————————————
愛情的滋味
ài-tsîng ê tsu-bī
有鹹酸甘甜
ū kiâm-sng-kam-tinn
有人夜夜失眠
ū-lâng iā-iā sit-bîn
嘛有人被幸福包圍
mā ū-lâng pī hīng-hok pau-uî
感謝天頂的星
kám-siā thinn-tíng ê tshinn
予咱愈來愈倚近
hōo lán jú lâi jú uá-kīn
雖然有時會觸喙
sui-jiân ū-sî ē tak-tshuì
咱的愛愈吵愈甜蜜
lán ê ài jú tshá jú tinn-bi̍t
你對我的心
lí tuì guá ê sim
勝過愛你家己
sìng-kuè ài lí ka-tī
將我當做寶貝
tsiong guá tòng-tsuè pó-puè
將我當做唯一
tsiong guá tòng-tsuè uî-it
天涯海角
thian-gâi hái-kak
嘛無夠綴你去
mā bô-kàu tuè lí khì
因為有你
in-uī ū lí
我的幸福才有意義
guá ê hīng-hok tsiah ū ì-gī
毋敢想有彼一工
m̄-kánn siūnn ū hit tsi̍t-kang
時間會將咱來拆分開
sî-kan ē tsiong lán lâi thiah hun-khui
把握珍惜現在
pá-ak tin-sioh hiān-tsāi
勇敢付出真心真意
ióng-kám hù-tshut tsin-sim tsin-ì
毋敢想有彼一工
m̄-kánn siūnn ū hit tsi̍t-kang
咱會漸漸老去
lán ē tsiām-tsiām lāu–khì
阮的幸福交予你
gún ê hīng-hok kau hōo lí
一世人咱攏愛黏黐黐
tsi̍t-sì-lâng lán lóng ài liâm-thi-thi
