五更鼓
《五更鼓》Gōo-kinn Kóo
郭金發Kueh Kim-huat
鄭秀美Tēnn Siù-bí
——————————————
一更更鼓月照山
it-kinn kinn-kóo ge̍h tsiò suann
牽君的手摸心肝
khan kun ê tshiú bong sim-kuann
你咱有緣來做伴
lí lán ū-iân lâi tsuè-phuānn
毋通放阮守孤單
m̄-thang pàng gún siú koo-tuann
有緣千里來相會
ū-iân tshian-lí lâi siong-huē
我比蝴蝶娘比花
guá pí ôo-tia̍p niû pí hue
良宵千金難得買
liông-siau tshian-kim lân-tit bué
做人青春有幾回
tsuè-lâng tshing-tshun ū kuí huê
二更更鼓月照埕
jī-kinn kinn-kóo ge̍h tsiò tiânn
牽君的手入大廳
khan kun ê tshiú ji̍p tuā-thiann
雙人相好天註定
siang-lâng siong-hó thinn tsù-tiānn
別人的話毋通聽
pa̍t-lâng ê uē m̄-thang thiann
別人的話我毋信
pa̍t-lâng ê uē guá m̄-sìn
全心欲佮阿娘親
tsuân-sim beh kah a-niû tshin
一日無看你一面
tsi̍t-ji̍t bô khuànn lí tsi̍t-bīn
宛然病後失精神
uán-jiân pīnn-āu sit tsing-sîn
三更更鼓月照門
sann-kinn kinn-kóo ge̍h tsiò mn̂g
牽君的手入繡床
khan kun ê tshiú ji̍p siù-tshn̂g
雙人相好有所向
siang-lâng siong-hó ū-sóo ǹg
較好燒水泡冰糖
khah hó sio-tsuí phàu ping-thn̂g
愛情比糖有較甜
ài-tsîng pí thn̂g ū khah tinn
可比鴛鴦在水池
khó-pí uan-iunn tsāi tsuí-tî
你也有情我有義
lí iā ū tsîng guá ū gī
青春少年正當時
tshing-tshun siàu-liân tsiànn-tong-sî
四更更鼓月照窗
sì-kinn kinn-kóo ge̍h tsiò thang
第一相好咱兩人
tē-it siong-hó lán nn̄g-lâng
佮君相好有所望
kah kun siong-hó ū-sóo bāng
阿君僥娘仙毋通
a-kun hiau niû sian m̄-thang
阿娘放心免煩惱
a-niû hòng-sim bián huân-ló
我來反僥絕對無
guá lâi huán-hiau tsua̍t-tuì bô
你有真真佮我好
lí ū tsin-tsin kah guá hó
毋驚前途起風波
m̄-kiann tsiân-tôo khí hong-pho
五更更鼓天欲光
gōo-kinn kinn-kóo thinn beh kng
恁厝爸母叫食飯
lín tshù pē-bú kiò tsia̍h-pn̄g
想欲開門叫君轉
siūnn-beh khui-mn̂g kiò kun tńg
手掛門屏心頭酸
tshiú kuà mn̂g-pîn sim-thâu sng
請娘安心免悲哀
tshiánn niû an-sim bián pi-ai
暫時忍耐分東西
tsiām-sî jím-nāi hun tang-sai
你咱愛情是原在
lí lán ài-tsîng sī guân-tsāi
你有愛我我也知
lí ū ài guá guá iā tsai
