虛假的人生
《虛假的人生》Hi-ké ê Jîn-sing
郭金發Kueh Kim-huat
——————————————
雖然你對我講起
sui-jiân lí tuì guá kóng-khí
只愛我一个
tsí ài guá tsi̍t-ê
男性的花言巧語
lâm-sìng ê hua-giân-khá-gí
啥人欲相信
siánn-lâng beh siong-sìn
為啥物為你一个
uī-siánn-mih uī lí tsi̍t-ê
愛你遮特別
ài lí tsiah ti̍k-pia̍t
到遮來只有看破
kàu tsia–lâi tsí-ū khuànn-phuà
忍受著孤單
jím-siū tio̍h koo-tuann
若是欲騙我
nā-sī beh phiàn guá
著愛騙我到澈底
tio̍h-ài phiàn guá kàu thiat-tué
毋通到半途
m̄-thang kàu puàn-tôo
才來予我心怨慼
tsiah lâi hōo guá sim uàn-tshueh
失戀的傷心滋味
sit-luân ê siong-sim tsu-bī
實在真難受
si̍t-tsāi tsin lân-siū
啥人欲共我安慰
siánn-lâng beh kā guá an-uì
空虛的悲哀
khang-hi ê pi-ai
毋知你遮爾薄情
m̄-tsai lí tsiah-nī po̍k-tsîng
風流一重重
hong-liû it-tîng-tîng
我對你遮爾真情
guá tuì lí tsiah-nī tsin-tsîng
你敢袂分明
lí kám buē hun-bîng
想延續逐家有緣
siūnn iân-sio̍k ta̍k-ke ū-iân
才會來熟似
tsiah ē lâi si̍k-sāi
何必就遐爾懼怕
hô-pit tiō hiah-nī kū-phà
毋敢來見面
m̄-kánn lâi kìnn-bīn
其實是天下女性
kî-si̍t sī thian-hā lú-sìng
所謂有公平
sóo-uī ū kong-pîng
愛你的心情也是
ài lí ê sim-tsîng iā-sī
自然的理性
tsū-jiân ê lí-sìng
無疑你對我變心
bô-gî lí tuì guá piàn-sim
梟雄佮殘忍
hiau-hiông kah tsân-jím
今夜才予我分明
kim-iā tsiah hōo guá hun-bîng
男性的絕情
lâm-sìng ê tsua̍t-tsîng
既然你毋敢見面
kì-jiân lí m̄-kánn kìnn-bīn
我就較清閒
guá tsiū khah tshing-îng
也毋免為你一人
iā m̄-bián uī lí tsi̍t-lâng
心肝一直凝
sim-kuann it-ti̍t gîng
彼一日熟似經過
hit-tsi̍t-ji̍t si̍k-sāi king-kè
當做是眠夢
tòng-tsuè sī bîn-bāng
世間人總是
sè-kan-lâng tsóng-sī
愛分南北佮西東
ài hun lâm-pak kah sai-tang
已經是破碎心情
í-king sī phuà-tshuì sim-tsîng
看破了一切
khuànn-phuà liáu it-tshè
無辜的空虛春夢
bû-koo ê khang-hi tshun-bāng
怎樣來體會
tsuánn-iūnn lâi thé-huē
人生也毋是永遠
jîn-sing iā m̄-sī íng-uán
攏總是虛假
lóng-tsóng sī hi-ké
幸福的美夢
hīng-hok ê bí-bāng
總是期待在來世
tsóng-sī kî-thāi tsāi lâi-sè
