豬母肉
《豬母肉》Ti-bó-bah
郭大誠 Kueh Tāi-sîng
——————————————
鴨肉啦雞肉啦 / ah-bah–lah ke-bah–lah
豬肉啦沙茶牛肉 / ti-bah–lah sa-te-gû-bah
貓仔肉鳥仔肉 / niau-á-bah tsiáu-á-bah
豬哥肉豬母肉 / ti-ko-bah ti-bú-bah
我攏總買啦 / guá lóng-tsóng bé–lah
只要是肉類的 / tsí-iàu sī bah-luī–ê
我今仔日攏總買啦 / guá kia̋nn-ji̍t lóng-tsóng bé–lah
買買買 / mái, mái, mái
羊仔肉 / iûnn-á-bah
買買買 / mái, mái, mái
豬母肉 / ti-bú-bah
市場內踅來又踅去 / tshī-tiûnn-lāi se̍h lâi iū se̍h khì
只要是肉類的 / tsí-iàu sī bah-luī–ê
我今仔日攏總買啦 / guá kia̋nn-ji̍t lóng-tsóng bé–lah
↓↓(口白)—(口白)—(口白)↓↓
看看看 / khuànn, khuànn, khuànn
菜市仔內 / tshài-tshī-á-lāi
通人攏掠我一直看 / thong-lâng lóng lia̍h guá it-ti̍t khuànn
看我因何哪會流凊汗 / khuànn guá in-hô ná ē lâu-tshìn-kuānn
菜市仔內踅十外逝 / tshài-tshī-á lāi se̍h tsa̍p-guā tsuā
見相都咧相肉攤 / kiàn siòng to leh siòng bah-thuann
啊都因為舊年 / ah to in-uī kū-nî
阮某怹大官 / guán bóo in ta-kuann
講我歲頭已經二十外 / kóng guá huè-thâu í-king jī-tsa̍p guā
叫我著緊娶 / kiò guá tio̍h kín tshuā
我毋才凊凊彩彩 / guá m̄-tsiah tshìn-tshìn-tshái-tshái
娶一个目睭大大喙闊闊 / tshuā tsi̍t-ê ba̍k-tsiu tuā-tuā tshuì khuah-khuah
愛食肉的查某倌來做伴 / ài tsia̍h bah ê tsa-bóo-kuann lâi tsò-phuānn
娶入門 / tshuā ji̍p-mn̂g
伊腹肚一日一日大 / i pak-tóo tsi̍t-ji̍t tsi̍t-ji̍t tuā
到頂個月仔 / kàu tíng-kò-gue̍h-á
才共我生一个彼號洋娃娃 / tsiah kā guá senn tsi̍t-ê hit-lō yángwáwa
到今也已經晬月外 / kàu-tann iā í-king tsè–gue̍h guā
洗衫煮飯買菜 / sé-sann tsú-pn̄g bé-tshài
猶原放予我 / iu-guân pàng hōo guá
早起六點半 / tsái-khí la̍k-tiám puànn
又閣命令我 / iū-koh bīng-līng guá
手捾菜籃來買肉 / tshiú kuānn tshài-nâ lâi bé bah
講叫我著愛買鴨肉 / kóng kiò guá to̍h-ài bé ah-bah
雞肉豬肉沙茶牛肉 / ke-bah ti-bah sa-te-gû-bah
鳥仔肉貓仔肉 / tsiáu-á-bah niau-á-bah
嗯 啥物豬哥豬母肉 / ngh… siánn-mih ti-ko ti-bú-bah
只要肉類的攏愛食就著 / tsí-iàu bah-luī–ê, lóng ài-tsia̍h tō tio̍h
你看 / lí khuànn
恁共我看 / lín kā guá khuànn
伊胃口有大抑無大 / i uī-kháu ū tuā ia̍h bô tuā
丈姆婆仔喂 / tiūnn-ḿ-pô–á–uê
我一個月才趁兩千外 / guá tsi̍t-kò-gue̍h tsiah thàn nn̄g-tshing-guā
恁查某囝對肉遐興 / lín tsa-bóo-kiánn tuì bah hiah hìng
我欲按怎 / guá beh án-tsuánn
好!人講豬母肉韌脯脯 / hó! lâng-kóng ti-bú-bah jūn-póo-póo
我決心 / guá kuat-sim
將我所有的兩千外箍 / tsiong guá sóo-ū ê nn̄g-tshing-guā khoo
全部買豬母肉 / tsuân-pōo bé ti-bú-bah
予你沓沓仔哺 / hōo-lí ta̍uh-ta̍uh-á pōo
看你對肉類的偌有路 / khuànn lí tuì bah-luī–ê guā ū-lōo
你哺了喙齒若歪去 / lí pōo liáu tshuì-khí nā uai khì
你就知艱苦 / lí tiō tsai kan-khóo
↑↑(口白)—(口白)—(口白)↑↑
買買買 / mái, mái, mái
羊仔肉 / iûnn-á-bah
買買買 / mái, mái, mái
豬母肉 / ti-bú-bah
市場內踅來又踅去 / tshī-tiûnn-lāi se̍h lâi iū se̍h khì
只要是肉類的 / tsí-iàu sī bah-luī–ê
我今仔日攏總買啦 / guá kia̋nn-ji̍t lóng-tsóng bé–lah
只要是肉類的 / tsí-iàu sī bah-luī–ê
我今仔日攏總欲買 / guá kia̋nn-ji̍t lóng-tsóng beh bé
