船碇
《船碇》Tsûn-tiānn
郭采潔Kueh Tshái-kiat
———————————
人生如海
jîn-sing jû hái
常常無法度靠岸
siông-siông bô-huat-tōo khò-huānn
有時人愈拍拚心愈孤單
ū-sî lâng jú phah-piànn sim jú koo-tuann
你無條件的愛
lí bô tiâu-kiānn ê ài
就是阮的船碇
tsiū-sī gún ê tsûn-tiānn
.
無情的誤會像風雨咧潑
bô-tsîng ê gōo-huē tshiūnn hong-hōo teh phuah
無人聽阮解說的聲
bô-lâng thiann gún kái-sueh ê siann
溫暖一句你相信我
un-luán tsi̍t-kù lí siong-sìn guá
就是阮的船碇
tsiū-sī gún ê tsûn-tiānn
.
你上知我無愛講我的疼
lí siōng tsai guá bô-ài kóng guá ê thiànn
倔強的面對我的夢
khut-kiông ê bīn-tuì guá ê bāng
飛著愛有風 袂當講足畏寒
pue tio̍h-ài ū hong, buē-tàng kóng tsiok uì-kuânn
希望的花佮落葉常做伴
hi-bāng ê hue kah lo̍h-hio̍h siông tsuè-phuānn
.
青春如沙
tshing-tshun jû sua
常常無理由驚惶
siông-siông bô lí-iû kiann-hiânn
幸福是離開的列車
hīng-hok sī lī-khui ê lia̍t-tshia
你攬著我
lí lám-tio̍h guá
就親像阮心內
tsiū tshin-tshiūnn gún sim-lāi
安穩的船碇
an-ún ê tsûn-tiānn
.
你上知 我需要有一條線
lí siōng tsai guá su-iàu ū tsi̍t-tiâu suànn
走偌遠 嘛感覺有伴
tsáu guā hn̄g, mā kám-kak ū-phuānn
你的愛予我有勇氣變開闊
lí ê ài hōo guá ū ióng-khì piàn khui-khuah
活出自己 有夢有價值
ua̍h tshut tsū-kī, ū bāng ū kè-ta̍t
.
思念如歌 就算是天涯海角
su-liām jû kua, tsiū sǹg-sī thian-gâi hái-kak
有你就啥物攏毋驚
ū lí tsiū siánn-mih lóng m̄-kiann
你保護我你等待我
lí pó-hōo guá lí tán-thāi guá
就是阮的船碇
tsiū-sī gún ê tsûn-tiānn
